Azərbaycan Respublikası noyabrın  4-dən -7-dək  İstanbulda keçiriləcək  Beynəlxalq kitab sərgisində iştirak edəcək.

Sərgidə ölkəmizi Mədəniyyət və Turizm Nazirliyi  və “Azərnəşr”, “Kaspi  nəşrləri”, “Hədəf  nəşrləri”, “Altun kitab”, “Qələm” və “Parlaq imzalar” nəşriyyatlarının əməkdaşlarından ibarət nümayəndə heyəti təmsil edəcək. Beynəlxalq kitab sərgisində  əsas məqsəd ölkəmizin zəngin mədəniyyətinin, inkişaf edən nəşriyyat-poliqrafiya sahəsinin, kitab sənətinin təmsil və təbliğ olunmasıdır.  Bu barədə Mədəniyyət və Turizm Nazirliyinin mətbuat xidməti  məlumat verib.

Hər il keçrilən  sərgiyə dünyanın əksər ölkələrindən xeyli sayda iştirakçı  qatılır.  Bu sərgidə ölkəmizin iştirakı böyük önəm kəsb edir. Çünki sərgidə  Azərbaycanın zəngin mədəniyyətinin, dinamik inkişafı və Qarabağ həqiqətləri təbliğ olunur, eyni zamanda,  nəşriyyat və informasiya sahəsində xarici tərəfdaşlarla əlaqələrin qurulması mühüm əhəmiyyət daşıyır.

Azərbaycan üçün ayrılmış  xüsusi stenddə dövlətçiliyimizə, tariximizə, mədəniyyətimizə və ölkəmizin turizm potensialına dair nəşrlər iştirakçılara təqdim ediləcək.

Həmçinin sərgi-yarmarka boyunca bir sıra tədbirlər keçiriləcək. Noyabrın 4-də  saat 15:00-da milli pavilyonda Molla Pənah Vaqifin  300 illiyi münasibətilə görkəmli şairə  həsr olunmuş tədbir keçriləcək. Həmçinin  nazirlik  tərəfindən nəşr olunmuş “Molla Pənah Vaqif”, Azərbaycan Milli Kitabxanası tərəfindən hazırlanmış “M.P.Vaqif. Biblioqrafiya” kitablarının təqdimat mərasimi də olacaq.

Noyabrın 5-də saat 13:00-da milli pavilyonda Mədəniyyət və Turizm Nazirliyinin 2016-cı ildən etibarən həyata keçirdiyi “Azərbaycan kitabının dünyaya tanıdılması”   layihəsi üzrə türkcə çap olunmuş 8 kitabın təqdimat mərasimi keçiriləcək.

Ülviyyə VAHİDQIZI,
“Xalq qəzeti”