İtaliyanın Paestum şəhərində XX "Arxeoloji turizm üzrə Aralıq dənizi yarmarkası"  keçirilmişdir. Bu barədə Mədəniyyət və Turizm  Nazirliyinin  mətbuat xidməti məlumat yayıb.

 Əhatə dairəsinə, mövzu və konsepsiyasına görə dünyada yeganə layihə hesab edilən sərgiyə UNESCO, İKKROM, İKOMOS və ÜTT kimi nüfuzlu beynəlxalq təşkilatlar tərəfdaşlıq edir.

Hər il dünyanın 30-dək ölkəsinin, eləcə də İtaliyanın əksər regionlarının və arxeoloji irsin mühafizəsi və təbliği üzrə ixtisaslaşmış təşkilatların qatıldığı tədbirdə Mədəniyyət və Turizm Nazirliyi  növbəti dəfə  iştirak edir. Nazirliyi qoruqlarla iş, tarix-mədəniyyət abidələrinin monitorinqi və təbliği sektorunun müdiri Könül Cəfərova və regionlarla iş sektorunun məsləhətçisi Qasım Şirinli təmsil edirlər.

Sərginin rəsmi açılışında İtaliyanın mədəni irs, fəaliyyətlər və turizm naziri Dario Françeskini, Kapaççio Pestum şəhərinin meri İtalo Voza və Salerno vilayətinin prezidenti Cuzeppe Canfaro iştirak ediblər. Sərgidə arxeologiya və turizm haqqında 25-dən çox konfrans və görüş keçirilib.

Bir neçə gün davam edən tədbirlər çərçivəsində ölkəmizə məxsus stenddə sərgiyə gələn qonaqlara  ingilis və italyan dillərində müxtəlif reklam-çap, ölkəmizim mədəni  və təbii irsinə, arxeoloji turizmə həsr olunmuş təbliğat materialları təqdim olunub.

Sərgi çərçivəsində ölkəmizin stendini Ümumdünya Turizm Təşkilatının baş katibi Taleb Rifai və Dünya İrsi üzrə Ərəb Regional Mərkəzinin direktoru Munir Buşenaki ziyarət ediblər.

M.MÜKƏRRƏMOĞLU,
“Xalq qəzeti”