Bununla bağlı "Park Cinema"da keçirilən mətbuat konfransında Avropa İttifaqının (Aİ) ölkəmizdəki nümayəndəliyinin rəhbəri, səfir Kestutis Yankauskas deyib ki, ənənəvi şəkildə davam edən bu festival artıq öz ticarət markasını qazanıb və bu il ilk dəfə Norveç də bu festivala qoşulub.

 Səfir bildirib ki, film festivalı çərçivəsində 19 Aİ ölkəsindən, eləcə də Norveç və Azərbaycandan 21 film nümayiş etdiriləcək.

 K. Yankauskasın sözlərinə görə, Avropa film festivalı Avropa İttifaqı ölkələri ilə Azərbaycan arasında mədəniyyət sahəsində əlaqələrin qurulmasına və inkişaf etdirilməsinə, Avropa kino sənayesi vasitəsilə Qərb dəyərlərinin daha yaxşı anlaşılmasına xidmət edir.

Avropa İttifaqı Azərbaycanla təkcə iqtisadi və siyasi sahələrdə deyil, həm də mədəniyyət sahəsində münasibətlər qurmağa çalışır.

Daha sonra çıxış edən Fransanın Azərbaycandakı səfirinin müavini Fabyen Lozinski qeyd edib ki, festival Fransanın "Lümer" filmi ilə açılacaq.

"Film dünya kinematoqrafının yaranmasına həsr olunub və arxiv sənədləri əsasında çəkilib, – deyə o bildirib.

Qeyd edək ki, festivalda Azərbaycanda çəkilmiş “Nar bağı" filmi nümayiş olunacaq.

M.MÜKƏRRƏMOĞLU,
“Xalq qəzeti”