Belarus Respublikasının Jlobin şəhərində Azərbaycanın və SSRİ-nin Xalq artisti, müğənni və bəstəkar Müslüm Maqomayevin 75 illik yubileyi konsert proqramı ilə qeyd olunub.

Diasporla İş üzrə Dövlət Komitəsindən verilən məlumatda bildirilir ki, “Bütün zamanların adı: Müslüm Maqomayev” musiqi lahiyəsi çərçivəsində keçirilən “Sən mənim melodiyamsan” adlı konsert proqramında yerli musiqiçilər iştirak ediblər. Konsertdə Müslüm Maqomayevin bəstələdiyi musiqilər və böyük sənətkarın repertuarından mahnılar ifa olunub.

Konsert Jlobin şəhərinin Regional İcraiyyə Komitəsinin ideoloji işlər, mədəniyyət və gənclərlə iş üzrə şöbəsi və “Belarus–Azərbaycan İcmalar Konqresi” Beynəlxalq İctimai Birliyinin Jlobin regional şöbəsinin birgə  təşəbbüsü ilə hazırlanıb.

Tədbirdə “Belarus–Azərbaycan İcmalar Konqresi” Beynəlxalq İctimai Birliyinin sədri Natiq Bağırovun rəhbərliyi ilə regional şöbələrin nümayəndələri,  həmçinin Azərbaycan Respublikasının Belarus Respublikasındakı səfirliyinin müşaviri Zülfüqar Tanrıverdi iştirak edib.

Konsert proqramı çərçivəsində “Belarus–Azərbaycan İcmalar Konqresi” Beynəlxalq İctimai Birliyini adından təşkilatın Jlobin regional şöbəsinin rəhbəri Əli Əhmədova fəal və məhsuldar işinə görə, rayon icraiyyə komitəsinin başçısı İvan Naumenkoya isə Azərbaycan və Belarus xalqlarının yaxınlaşmasında göstərdiyi xidmətlərə görə fəxri fərmanlar təqdim olunub.

Konsertin keçirildiyi Metallurqlar Mədəniyyət Sarayının foyesində Azərbaycan milli geyimləri, əl işləri nümayiş etdirilib.

Samirə Əliyeva,
“Xalq qəzeti”