Hər kəs duyğulu idi həmin gün. Səslənən şeirlər,  mahnılar, söylənilən kövrək xatirələr – hamısı Milli Qəhrəman Samid İmanovun igidliyinin, vətənsevərliyinin təsvirində aciz idi... Doğulub boya-başa çatdığı doğma yurdu Neftçala gəncləri, bütövlükdə ictimaiyyəti  ötən ilin Aprel döyüşləri zamanı şəhid olmuş, ölümündən sonra “Azərbaycan Milli Qəhrəmanı” adına layiq görülmüş İmanov Samid Gülağa oğlunun  xatirəsinin işığına toplaşmışdı....

Tədbir “20 Yanvar” İctimai Birliyi  “Yeniyetmə və gənclər  arasında vətənpərvərlik təbliğatının aparılması məqsədilə tədbirlərin  təşkili” layihəsi çərçivəsində   Neftçala rayon 1 nömrəli tam orta məktəbdə  Azərbaycan Respublikası Prezidenti Yanında  Qeyri-Hökumət Təşkilatlarına Dövlət Dəstəyi Şurasının maliyyə yardımı  ilə baş tutub.

Tədbirdə “Vətənpərvərliyin Təbliğinə Dəstək” İctimai Birliyinin sədri, hərbi vətənpərvərlik mövzusunda mahnıların  tanınmış ifaçısı və  tədbirin aparıcısı Şəmistan Əlizamanlı, Milli Qəhrəmanımız mayor Samid İmanovun ailə üzvləri, “Kür-Xəzər” Xeyriyyə Cəmiyyətinin sədri,  Azərbaycan Respublikası Ağsaqqallar Şurası İdarə Heyətinin üzvü Akif Kərimov, “Qarabağ qaziləri” İctimai Birliyi mətbuat xidmətinin rəhbəri,  “qaziler.az”  saytının baş redaktoru Rey Kərimoğlu, VisionTV-nin əməkdaşı Fərqanə Əliyeva, “Neftçala Qadınlarının Sosial İnkişafına Dəstək” İB-nin sədri Gülqədəm Mirzəzadə, “20 Yanvar” İctimai Birliyinin sədri Sultan Əzimzadə və sədr müavini Mustafa Əliyev, layihənin icraçısı Şəhla Qarayeva qəhrəmanın şücaətindən, Vətən qarşısında xidmətlərindən  danışdılar.  Məktəbin müəllim və şagird kollektivinin iştirak etdiyi tədbirdə çıxış edənlər gənclərin hərbi vətənpərvərliyinin yüksək səviyyədə olduğunu bildirdilər. Qeyd edildi ki, Aprel döyüşlərində iştirak etmiş, şəhid olmuş  igidlərin hər bir şücaəti gəncliyə örnəkdir.

Milli Qəhrəman Samid İmanovun xatirəsinə həsr olunmuş videoçarx tamaşaçılar tərəfindən maraqla qarşılandı.  Daha sonra isə tədbirin aparıcısı Şəmistan Əlizamanlının hərbi vətənpərvərlik mahnısının ifası, yeniyetmə və gənclərin  şeirlər səsləndirməsi tədbirə ayrı bir  ovqat qatdı.

Heydər Əliyev adına Ali Hərbi Məktəbi fərqlənmə diplomu ilə bitirən gənc zabit Samid İmanov özünü peşəkar hərbçi kimi formalaşdırmaq üçün durmadan çalışıb.

Heydər Əliyev adına Ali Hərbi Məktəbi fərqlənmə diplomu ilə bitirmiş Samid İmanov ordumuzun gənc peşəkar zabitlərindən idi. Müxtəlif  xarici ölkələrdə  beynəlxalq hərbi təlimlərdə təcrübə və biliyini daim artıran qəhrəmanımız  Aprel döyüşlərində isə öz rəşadəti ilə gəncliyə Vətəni sevməyi və qorumağı  əyani şəkildə öyrətdi.

Aprelin 3-dən 4-nə ötən gecə döyüş zamanı mayor S. İmanov neytral ərazidə ayağından və çiynindən qəlpə yarası alsa da, döyüşü davam etdirir.  Əsgərlər onu döyüş meydanından aparmaq  istəsə də, Samid İmanov buna qəti sürətdə etiraz edərək onun əvəzinə yaralı gizirin çıxarılmasını əmr edir. 

Qəhrəmanlıq tariximizdə xüsusi iz qoyan Samid  İmanovun  qəhrəmanlıq yolu yetişən gənc nəsil üçün bir örnəkdir.

Əfsanə BAYRAMQIZI,
“Xalq qəzeti”