C.Cabbarlı adına “Azərbaycanfilm” kinostudiyasında “Bakı Beynəlxalq film festivalı”nın təşəbbüs qrupunun iclası keçirilib.

Kinostudiyanın direktoru Müşfiq Hətəmovun sədrliyi ilə keçirilən iclasda Azərbaycan Respublikası Kinematoqrafçılar İttifaqının birinci katibi, rejissor Cəmil Quliyev, Mədəniyyət və Turizm Nazirliyinin kino yaradıcılığı və filmlərin təbliği sektorunun müdiri Yusif Şeyxov, prodüser və hüquqşünas Fikrin Bektaşi, kinoşünas Ayaz Salayev, rejissor Elçin Musaoğlu, Bakı Film İnstitutunun rəhbəri Fehruz Şamıyev iştirak ediblər.

M. Hətəmov qeyd edib ki, festivalın nizamnaməsinin hazırlanması üçün iş aparılır, maliyyə, təşkilati və informasiya dəstəyi verən qurumlarla danışıqlara başlanılıb: “Bu gün Azərbaycan filmləri beynəlxalq festivallarda uğurla nümayiş olunur, mükafatlar qazanırlar. Bakı Beynəlxalq film festivalı Azərbaycan kinosunun dünya kino mühitinə daha ciddi inteqrasiya olunmasında vacib addımdır”.

Bildirilib ki, festivalın hər il keçirilməsi planlaşdırılır. Bir həftə davam edəcək festivalda filmlər müsabiqə əsasında seçiləcək. Münsiflər heyətində beynəlxalq kino aləmində tanınan sənətçilər təmsil ­olunacaqlar.

M.MÜKƏRRƏMOĞLU,
“Xalq qəzeti”