Azərbaycan Dillər Universitetində fəaliyyət göstərən Bakı Amerika Mərkəzində Azərbaycan kitabxanalarında Amerika guşələrinin yaranmasının 10 illiyi ilə əlaqədar yubiley konfransı təşkil olunmuşdur. Bu konfrans “Beynəlxalq informasiya proqramı” layihəsi çərçivəsində keçirilmişdir.

Mədəniyyət və Turizm Nazirliyinin tabeliyində olan 4 regionun mərkəzi kitabxanalarında 10 il bundan öncə ilk Amerika guşələri yaradılmışdır: Gəncə şəhər, Kürdəmir, Salyan və Xaçmaz rayon mərkəzi kitabxanalarında 2007-ci ildə Azərbaycan Respublikasının Prezidenti İlham Əliyevin tapşırığı əsasında Mədəniyyət və Turizm Nazirliyi və ABŞ-ın  Azərbaycan Respublikasındakı səfirliyi arasında bir sıra regionlarda Amerika guşələrinin yaradılması və fəaliyyəti haqqında beş il müddətinə Anlaşma Memorandumu imzalanmışdır. Sözügedən memorandum Prezidentin fərmanı ilə təsdiq olunmuşdur. Sonradan daha beş il müddətinə uzadılmış Memorandum əsasında regionlarda yaradılmış Amerika guşələri iki ölkə arasında əlaqələrin daha da möhkəmlənməsi və genişləndirilməsinə xidmət edir.

 Amerika guşələrində istifadəçilər ABŞ-ın dövlətçiliyi, tarixi, iqtisadiyyatı, mədəniyyəti və s. sahələri ilə tanış olurlar. Onlar üçün burada ingilis dili biliklərini daha da təkmilləşdirməyə əlverişli imkan yaradılır. Guşələrdə müxtəlif avadanlıq, maraqlı kitablar oxucuların istifadəsinə verilir. Burada innovativ layihələrlə yanaşı,  müxtəlif tədbirlər və müsabiqələr də keçirilir.

Tədbirdə Mədəniyyət və Turizm Nazirliyinin kitab dövriyyəsi sektorunun müdiri Lətifə Məmmədova bildirmişdir ki, 10 il müddətində Azərbaycan kitabxanalarında fəaliyyət göstərən Amerika guşələri maraqlı layihələr həyata keçirmişlər. Bu guşələrdə Azərbaycan gəncləri üçün xarici ölkələrdə təhsil almaq imkanları barədə geniş məlumat verilmişdir. Bir çox insanlar ingilis dili biliklərini təkmilləşdirmiş və  öyrənmişlər. Çıxışda qeyd olunmuşdur ki, Azərbaycan – ABŞ münasibətlərinin yaradılmasından 25 il keçir. Bu illər ərzində iki ölkə arasında əlaqələr möhkəmlənmiş,  siyasi, iqtisadi və mədəni sahələrdə əməkdaşlıq genişlənmişdir.  Ölkə başçısı kitabxana-informasiya sahəsinə mühüm əhəmiyyət verir. 2004-2008-ci illərdə kitabxana sahəsinin inkişafına dair  Prezident tərəfindən 5 sərəncam imzalanmışdır. Bu sərəncamların hər biri kitabxana-informasiya sahəsinin inkişafına böyük təkan vermişdir.

L.Məmmədova bildirmişdir  ki, Amerika guşələrinin əməkdaşları öz təcrübələrini digər regionlarda da yaymalı və daha maraqlı və aktual layihələrlə çıxış etməlidirlər. “Biz çalışmalıyıq ki, Azərbaycanda fəaliyyət göstərən Amerika guşələri yalnız postsovet məkanında deyil,  ümumən  dünya ölkələrində fəaliyyət göstərən Amerika guşələri arasında öz işləri ilə fərqlənsin və birincilər sırasına çıxsın”.

ABŞ səfirliyinin ictimaiyyətlə əlaqələr bölməsinin rəhbəri Kerolayn Savec çıxışında  demişdir  ki, Azərbaycan – ABŞ  əlaqələri yüksək səviyyədə inkişaf edir. Daha sonra o, Amerika guşələrinin fəaliyyəti haqqında qısa məlumat vermiş və qeyd etmişdir ki, Amerika hökuməti bu guşələrin fəaliyyətini dəstəkləyir və onlara lazımi kömək göstərir. K. Savec Mədəniyyət və Turizm Nazirliyinin rəhbərliyinə minnətdarlığını bildirmiş və demişdir  ki, ötən on il ərzində nazirlik tərəfindən guşələrə hər cür təşkilati dəstək göstərilmişdir.

Azərbaycan Dillər Universitetinin rektoru, akademik Kamal Abdullayev  çıxışında bildirmişdir  ki, Bakı Amerika Mərkəzi Azərbaycan Dillər Universitetində on ildir ki, fəaliyyət göstərir.  Bu illər ərzində o,  regionlardakı Amerika guşələrinə dəstək verib, onların işini koordinasiya edərək daha yüksək pilləyə çatdırıb. Rektor Azərbaycanın multikultural və tolerant ölkə olduğunu söyləmiş və bu istiqamətdə maraqlı faktları konfrans iştirakçılarına çatdırmışdır.

  İki gün davam edən konfransda   Amerika guşələrinin koordinatorları yeni maraqlı layihələrlə, ABŞ haqqında məlumatlarla, ingilis dilinin tədrisi  ilə bağlı proqramlarla tanış olmuşlar. Konfrans zamanı ustad dərslər və təcrübə mübadilələri, sosial media ilə işləmə texnologiyaları, marketinq ,  menecment və s. məsələlər geniş müzakirə edilmişdir.

Tədbirdə Gəncə şəhəri, Kürdəmir, Xaçmaz, Salyan rayonlarında  fəaliyyət  göstərən Amerika guşələrinin koordinatorları öz iş təcrübələri ilə iştirakçıları tanış etmişlər.

M. MÜKƏRRƏMOĞLU,
“Xalq qəzeti”