Azərbaycan ərazisinə almanların köçürülməsindən və alman kaloniyalarının salınmasından 200 il ötür.

Bununla bağlı keçiriləcək  tədbirlər UNESCO-nun yubiley proqramına daxildir. Azərbaycan Respublikasının Prezidenti İlham Əliyevin 30 avqust 2016-cı il tarixli “Cənubi Qafqaz regionunda alman məskənlərinin salınmasının 200 illiyi haqqında” sərəncamı Azərbaycanda tarixi irsə diqqət və qayğını, respublikada alman mədəniyyəti abidələrinin dövlət səviyyəsində qorunması və bərpasını, ölkəmizdə tolerantlıq və multikulturalizm siyasətini  nümayiş etdirir.

Bununla bağlı  Azərbaycan Musiqi Mədəniyyəti Dövlət Muzeyinin filialı olan Maestro Niyazinin mənzil- muzeyində  Azərbaycan Respublikası Mədəniyyət və Turizm Nazirliyinin Mədəniyyətşünaslıq üzrə Elmi–Metodiki Mərkəzinin və həmin muzeyin birgə təşkil etdikləri “Mədəniyyət naminə elm” adlı layihənin “Azərbaycanda alman mədəniyyəti irsinin izləri” mövzusunda növbəti elmi seminarı keçirilmişdir.

Tədbirdə AMEA Tarix İnstitutunun aparıcı elmi işçisi,  tarix elmlər doktoru İkram Ağasiyev almanların Cənubi Qafqazda və Azərbaycanda hansı səbəbdən məskunlaşmasından, onların mədəniyyətindən, dilindən, dinindən, adət-ənənələrindən, iqtisadi və məişət həyatından bəhs etmişdir. Günay Əliyeva “Almanlar Azərbaycanda” adlı məruzəsində  almanların ölkəmizin hansı regionlarında almanların məskunlaşmasından, fəaliyyətindən, alman tarixi-mədəni abidələrindən danışmışdır.

Sonda mərkəzin direktoru A.Usubəliyev  qeyd etmişdir ki, layihənin əsas məqsədi respublikanın elmi potensialını mədəniyyət sahəsinin inkişafına yönəltməkdən ibarətdir.

M.MÜKƏRRƏMOĞLU,
  “Xalq qəzeti”