Hüseyn Ərəblinski adına Sumqayıt Dövlət Dram Teatrı türk yazıçısı Turqut Özakmanın yüksək səviyyədə hazırlanmış “Ocaq” tamaşasının premyerası ilə özünün 49-cu mövsümünə start verib.

Tamaşadan əvvəl teatrın direktoru, Əməkdar mədəniyyət işçisi İslam Həsənov, baş rejissor, Əməkdar artist Firudin Məhərrəmov, Əməkdar artist Namis Şirməmmədov və başqaları seyrçiləri salamlayaraq yaradıcılıq planlarından və yeni səhnə əsərinin aspektlərindən danışıblar. Premyeranı Sumqayıt  şəhər rəhbərliyi və teatrsevərlər maraqla  izləyiblər. Psixoloji dram əsəri olan “Ocaq” rejissor Firudin Məhərrəmovun yozumunda səhnə həllini tapmışdır. Tamaşada bir ailənin təbəddülatı kontekstində cəmiyyətin müxtəlif sosial və yaş kateqoriyalarının həyata baxış bucağı mükəmməl şəkildə təqdim olunmuşdur. Özünü paşa arvadı zənn edən nənə xəyal buludlarının üstündə qanad çalır və hər kəs bu yalan ocağının altına köz qoymaqla  dərdini ovudur. Başlıca qayə onu təlqin etməkdir ki, hər qaranlığın bir aydın səhəri var.

Əməkdar artistlər Rauf Ağakişiyev (Ata), Fəranə Musayeva (Nənə), Cəlal Məmmədov (Nihad), həmçinin aktyorlar Xatirə Süleymanova (Ana), Oqtay Mehdiyev (Fazil), Şəhla Məmmədova və Şəmistan Süleymanlının (Özcan) yaratdıqları obrazlar uğurlu və yaddaqalan olub. Psixoloji nüanslarla zəngin səhnələr məharətlə oynanılıb. 

Əli NƏCƏFXANLI,
“Xalq qəzeti”