Quzey Kıbrıs Türk Cümhuriyyətinin (QKTC) Bakı nümayəndəliyinin təşkilatçılığı ilə “Ləndmark” hotelində “Türk dünyasının Kıbrısı” kitabının təqdimat mərasimi keçirilmişdir.

Mərasimi giriş sözü ilə açan QKTC-nin Bakı təmsilçisi Ufuk Turganer bildirmişdir ki, “Xalq qəzeti” baş redaktorunun müavini, Əməkdar mədəniyyət işçisi, yazıçı-jurnalist Afət Sadıqoğlunun qələmə aldığı, səfər təəssüratları və yol qeydlərindən ibarət “Türk dünyasının Kıbrısı” adlı yeni kitabının əlaqələrimizin tarixinin öyrənilməsi, əməkdaşlığının tədqiqi, turizm imkanlarının təbliği baxımından mühüm əhəmiyyəti var.

Təqdimat mərasimində çıxış edən QKTC-nin milli təhsil və mədəniyyət naziri Özdəmir Berova son illər Azərbaycan ilə Quzey Kıbrıs Türk Cümhuriyyəti əlaqələrinin daha yaxın olması, ictimai, iqtisadi, mədəni münasibətlərin inkişafı sayəsində dost və qardaş Azərbaycan ilə əlaqələrin, xüsusilə, təhsil sahəsinin xeyli inkişaf etdiyini bildirmiş, bu işdə QKTC Bakı təmsilçiliyinin fəaliyyətinin artdığını qeyd etmişdir.Nazir vurğulamışdır ki,tarixdən gələn möhkəm tellərlə bir-birinə bağlı olan Azərbaycan və Kıbrıs türk xalqları əlaqələrinin genişlənməsi, möhkəmlənməsi, könülaçan münasibətlər “Türk dünyasının Kıbrısı” kitabında geniş əksini tapmışdır.

Yazıçı-jurnalist Afət Sadıqoğlu çıxışında kitabın nəşrinə göstərdiyi dəstəyə görə QKTC-nin Bakı təmsilçiliyinə və mərasim iştirakçılarına minnətdarlıq edərək, bu kitab, Azərbaycanla Türkiyənin və Quzey Kıbrısın tarixi, siyasi, iqtisadi, mədəni-mənəvi, ədəbi əlaqələrinin daha da möhkəmlənməsinə kömək edəcəyini, türk xalqlarının qardaşlığı və dostluğu yolunda daha bir körpü olacağını bildirmişdir.

“Xalq qəzeti”