Qazaxıstanın paytaxtı Astana şəhərində keçirilən “Astana Ekspo-2017” beynəlxalq sərgidə Azərbaycan stendi ən çox ziyarət edilən pavilyonların ilk beşliyinə daxil olub.

“APA-Economics”in “Srutnik Qazaxıstan” agentliyinə istinadən verdiyi məlumata görə, beynəlxalq sərginin başladığı vaxtdan, yəni iyunun 10-dan bu günə qədər “Astana Ekspo-2017”-ni ümumilikdə 2 milyon 779 min 820 nəfər ziyarət edib.

Təkcə avqustun 14-dən 20-dək beynəlxalq sərgiyə 345 min 445 nəfər təşrif buyurub. Gündəlik olaraq isə orta hesabla “Astana Ekspo-2017” sərgisinə 49 min 349 min nəfər gəlib.

“Astana Ekspo-2017” sərgisinin başladığı gündən avqustun 20-dək isə sərginin bütün obyektlərində ümumilikdə 22 milyon 113 min 603 nəfər olub.

Beynəlxalq sərgidə daha çox Plaza Afrika pavilyonu ziyarət edilib. Ziyarətçi sayına görə, ilk beşliyə Misir, Türkiyə, Tailand və Azərbaycan daxil olub. Sonrakı yerlərdə Hindistan, Rusiya, Özbəkistan, Yaponiya və Birləşmiş Səudiyyə Krallığının pavilyonları qərarlaşıb.

Qeyd edək ki, “Astana Ekspo-2017” beynəlxalq sərgisi sentyabrın 10-da yekunlaşacaq.