Avqustun 13-də paytaxtımızın gözəl məkanlarından biri olan Fəvvarələr meydanında 41-ci Dünya Skaut Konfransı çərçivəsində fotosərgi açılıb.

AZƏRTAC xəbər verir ki, sərgi paytaxt sakinləri və xarici qonaqlar arasında dünya skaut hərəkatını təbliğ etmək, ölkəmizə gələn skaut iştirakçıları arasında qiymətli xatirələri bölüşmək məqsədilə təşkil edilib.

Sərgidə skautların xüsusi tədbirləri zamanı çəkilən fotoları sərgilənib. Şəhərimizin sakinləri və qonaqlarımızın böyük marağına səbəb olan sərgi avqustun 20-dək davam edəcək.

Qeyd edək ki, 41-ci Dünya Skaut Konfransı Gənclər və İdman Nazirliyinin dəstəyi ilə Dünya Skaut Hərəkatı Təşkilatı və Azərbaycan Skaut Assosiasiyası tərəfindən avqustun 14-dən 18-dək Bakı Konqres Mərkəzində keçiriləcək.

“Birlikdə Müsbət Dəyişikliyə doğru” mövzulu konfrans 159 Milli Skaut Təşkilatının nümayəndələrini, tərəfdaşlarını və qonaqlarını bir araya gətirən irimiqyaslı tədbirdir.