Hər il olduğu kimi, bu yay da şəhər sakinlərinin və  turistlərin həftə sonu istirahətinin maraqlı keçməsi üçün Bakı Şəhər Mədəniyyət və Turizm Baş İdarəsinin təşkilatçılığı ilə  Fəvvarələr  meydanında keçirilən “Retro Bakı” layihəsi çərçivəsində yenidən açıq hava konsertlərinə start verilib. Bu barədə Mədəniyyət və Turizm Nazirliyi məlumat verib.

Açıq səma altında  təşkil edilən ilk açılış konsertində tanınmış cazmen, Əməkdar incəsənət xadimi Cavan Zeynallı isti yay  günlərində insanların könüllərini oxşayıb. Konsertdə  məşhur şanson mahnıların ifaçısı Ceyhun Bakinski, estrada  müğənniləri  Yaqut Babayeva, Dua Murad, Gümüş, Tafur, Anar Nağılbaz, Nailə Müslümova, Səbinə Əsgərova, Mehman Tağıyev  öz çıxışları ilə   gecəyə əlavə rəng qatıblar.  Həmçinin, konsertdə milli və dünya xalqlarının rəqsləri təqdim olunub. Tədbirdə yaradıcı gənclərin əl işlərindən ibarət rəsm sərgisi maraqla qarşılanıb.

Qeyd edək ki, Azərbaycan
musiqi incilərinin, korifey bəstəkarların əsərlərinin tanıdılması layihənin əsas məqsədlərindəndir.  “Retro Bakı”
sentyabrın 15-dək hər həftə sonu axşam saatlarında  Fəvvarələr  meydanında  zəngin konsert proqramı və tanınmış müğənnilər ilə bakılıların və şəhər qonaqlarının  görüşünə gələcəkdir.

Ülviyyə VAHİDQIZI,
“Xalq qəzeti”