Bakı Slavyan Universitetində (BSU) məzun gününə həsr olunmuş təntənəli tədbir keçirilmişdir. Tədbirdə BSU əməkdaşları, valideynlər və tələbələr iştirak edirdilər.

BSU-nun rektoru, professor Nurlana Əliyeva qonaqları tədbir iştirakçılarına təqdim edərək, onlar arasında 1997-ci ildə universiteti bitirən məzunların da olduğunu bildirib. Magistrant və tələbələri məzun adı qazanmaları münasibətilə təbrik edən rektor onlara gələcək fəaliyyətlərində Bakı Slavyan Universitetinin adını uca tutmağı və müstəqil ölkəmizin tərəqqisinə öz layiqli töhfələrini verməyi tövsiyə edib.

Daha sonra dörd il ərzində təhsildə yüksək nailiyyətlərinə və universitetin ictimai həyatında fəal iştirakına görə fərqlənən 62 nəfər məzuna “Fəxri məzun” diplomu və xatirə hədiyyələri təqdim edib.

Tədbir geniş konsert proqramı ilə davam edib. Konsertdə universitetin “Arzu” rəqs ansamblının təqdimatında rəqslər nümayiş olunub, tələbələrin ifasında mahnılar ifa edilib.

Hərbi qulluğa yollanacaq məzunlar əsgər marşı, şeir və vətənpərvər ruhlu mahnılardan ibarət maraqlı kompozisiya təqdim ediblər. Sonda məzunların ifasında “Əlvida BSU” mahnısı ilə konsert proqramı başa çatıb.

Qeyd edək ki, bu il Bakı Slavyan Universitetindən bakalavriat səviyyəsi üzrə əyani təhsil alan 729, qiyabi təhsil alan 48 tələbə və magistratura səviyyəsi üzrə 79 magistrant məzun olub.

M.MÜKƏRRƏMOĞLU,
 “Xalq qəzeti”