Mədəniyyət və Turizm Nazirliyi, Milli Kitabxana və AMEA-nın A.A.Bakıxanov adına Tarix İnstitutunun təşkilatçılığı ilə Milli Kitabxanada “Heydər Əliyev: Azərbaycan xalqının Qurtuluş mübarizəsinin qalibi” mövzusunda elmi konfrans və “15 İyun Milli Qurtuluş Günüdür” adlı kitab sərgisinin açılışı olmuşdur.

Əvvəlcə tədbir iştirakçıları ümummilli liderin həyat yolunu əks etdirən “15 İyun Milli Qurtuluş Günüdür” kitab sərgisi ilə tanış olmuşlar. Sərgidə 200-ə yaxın ədəbiyyat nümayiş olunmuşdur.

Milli Kitabxananın direktoru, professor Kərim Tahirov “Heydər Əliyev: Azərbaycan xalqının qurtuluş mübarizəsinin qalibi” mövzusunda elmi konfransdakı  çıxışında əvvəlcə ümummilli liderin həyat yoluna qısaca nəzər salmış, ulu öndərin Azərbaycanın müstəqilliyinin qorunub saxlanılmasında, ölkəmizin  dünyaya tanıdılmasında göstərdiyi  xidmətlərindən, habelə onun mədəniyyətə, incəsənətə verdiyi yüksək qiymətdən söz açmışdır.

Sonra ümummilli lider haqqında film nümayiş olunmuşdur.

Tədbirdə  mədəniyyət və turizm nazirinin birinci müavini Vaqif Əliyev dünyada layiqli hörmət və böyük nüfuz qazanmış görkəmli dövlət xadimi haqqında danışmış, onun uzaqgörən və istedadlı idarəçiliyi sayəsində Azərbaycanın sürətlə inkişaf etdiyini diqqətə çatdırmışdır.

Milli Məclisin deputatı,  AMEA-nın A.A.Bakıxanov adına Tarix İnstitutunun direktoru, akademik Yaqub Mahmudov, institutun Əliyevşünaslıq şöbəsinin rəhbəri, professor Ədalət Qasımov, şöbənin aparıcı elmi işçisi, tarix üzrə fəlsəfə doktoru Leyla Hüseynova, Azərbaycan mədəniyyəti tarixi şöbəsinin aparıcı elmi işçisi, tarix üzrə fəlsəfə doktoru Nigar Axundova  Heydər  Əliyevin dövlətçiliyimizin tarixindəki misilsiz xidmətlərindən söz açmışlar.

Tədbirin sonunda AMEA-nın A.A.Bakıxanov adına Tarix İnstitutunun son illərdə çapdan çıxmış nəşrləri Milli Kitabxanaya hədiyyə olunmuşdur.

M.MÜKƏRRƏMOĞLU,
“Xalq qəzeti”