Kubanın nüfuzlu “Bohemia” jurnalında IV İslam Həmrəyliyi Oyunları barədə ölkənin tanınmış jurnalisti Maria Viktoria Valdesin geniş məqaləsi dərc edilib.

Azərbaycanın Kubadakı səfirliyindən verilən məlumata görə, “Zirvəyə doğru yüksələn ölkədə daha bir böyük idman hadisəsi” başlıqlı yazıda Bakıda keçirilən İslam Həmrəyliyi Oyunlarında ən yüksək nəticə ilə qalib gələn Azərbaycanda xüsusi dövlət proqramına uyğun olaraq kütləvi və peşəkar idmanın inkişaf etdirilməsindən söz açılır. Bu mühüm siyasətin əsasının ümummilli lider Heydər Əliyev tərəfindən qoyulduğu və hazırda Prezident İlham Əliyev tərəfindən böyük uğurla davam etdirildiyi vurğulanır.

Məqalədə Azərbaycanın Birinci vitse-prezidenti, IV İslam Həmrəyliyi Oyunlarının Təşkilat Komitəsinin sədri Mehriban Əliyevanın yarışların təşkilində mühüm xidmətlərindən söz açılır, “Bakı 2017” Oyunlarının olduqca yüksək səviyyədə təşkil edilməsi və heyranedici açılış və bağlanış mərasimləri ilə yaddaşlarda qalacağı bildirilir. Qeyd edilir ki, “Gücümüz həmrəylikdədir” devizi ilə başa çatmış idman bayramı qardaşlıq və birlik ideyalarını özündə daşıyan İslam mədəniyyətinə məxsus müxtəlif cəmiyyətləri Bakıda birləşdirib.

Müəllif  Mehriban Əliyevanın çıxışına istinadən diqqətə çatdırır ki, Birinci Avropa Oyunları zamanı bütün qitəni birləşdirərək tarix yazmış Azərbaycan “Bakı 2017” çərçivəsində sülh, tolerantlıq və xeyirxahlıq ideyaları altında dörd qitəni təmsil edən İslam dünyasını bir araya gətirdi.

Yazıda daha sonra bildirilir ki, bütün bunlar və beynəlxalq idman ictimaiyyəti üçün təşkil edilmiş IV İslam Həmrəyliyi Oyunları tarixi idman hadisəsi kimi Azərbaycanın dinamik inkişafının bariz nümunəsidir. Məqalədə qədim tarixə malik Azərbaycanın, eyni zamanda, gənc, sürətlə inkişaf edən müstəqil dövlət olaraq, çoxmədəniyyətlilik ənənələrinə söykənən, açıq və tolerant bir cəmiyyət olduğu göstərilir.

Kubalı jurnalist IV İslam Həmrəyliyi Oyunlarının rəmzi kimi dünyada məşhur olan Qarabağ atlarından, habelə Azərbaycanın milli atüstü oyunları olan  çövkən, yaylıqqaçırtdı, sürpapağın timsalında idman ənənələrindən bəhs edir. Bildirilir ki, “Çövkən” atüstü oyunu haqda “Dədə Qorqud” salnaməsində, Nizami Gəncəvinin “Xosrov və Şirin” poemasında tarixi məlumatlara rast gəlmək olar.

Yazıda vurğulanır ki, son on ildən çox müddətdə Azərbaycanda müxtəlif miqyaslı yüzlərlə beynəlxalq idman yarışları, o cümlədən Avropa və dünya birincilikləri çox yüksək səviyyədə keçirilib. Böyük beynəlxalq idman tədbirlərinin mükəmməl təşkilinə görə, habelə idmançılar və bütün qonaqların ehtiyaclarının lazımi şəkildə qarşılanmasına zəmanət verə bildiyi üçün Azərbaycan dünya miqyasında vacib idman ölkəsi kimi böyük nüfuz və etimad qazanıb. Bu xüsusda həmçinin, Bakıda keçirilmiş Avropa Oyunları, Dünya Şahmat Olimpiadası, “Formula-1” yarışları barədə ayrıca məlumat verilir. Bütün bunların beynəlxalq olimpiya ailəsi tərəfindən Azərbaycana olan marağın daha da böyüməsinə və ölkəmizin irimiqyaslı beynəlxalq yarışların keçirildiyi mərkəzə çevrilməsinə səbəb olduğu qeyd olunur.

Məqalədə son zamanlarda Azərbaycan və Kuba arasında idman sektorunda uğurlu əməkdaşlıq əlaqələrinin inkişaf etdirilməsindən də söz açılır. Bu xüsusda, iki ölkənin yunan-Roma və sərbəst güləş üzrə yığma komandalarının 2016-cı ilin may ayında Azərbaycanda birgə təlim-məşq toplanışları keçirməsi, həmçinin Bakıda ötən ilin sentyabr ayında Azərbaycan və Kuba Şahmat federasiyaları arasında əməkdaşlıq haqqında anlaşma memorandumunun imzalanması barədə məlumat verilir.

Hazırladı: R.TAHİR,
“Xalq qəzeti”