Fransanın paytaxtı Parisdə Azərbaycanın Dostları Assosiasiyasının və Paris Azərbaycan Evinin təskilatçılığı ilə Azərbaycan Xalq Cümhuriyyətinin 99-cu ildönümünə həsr olunmuş “Azərbaycana səyahət” adlı fotosərgi açılmışdır.

Türk-müsəlman Şərqində ilk respublika olan Azərbaycan Xalq Cümhuriyyətinin yaradılmasının ildönümü münasibətilə təşkil olunmuş ekspozisiyanın açılış mərasimində Azərbaycanın Dostları Assosiasiyasının baş katibi, Paris Azərbaycan Evinin sədri Mirvari Fətəliyeva qonaqları salamlamış, sərginin ölkəmizi fransızlara görüntülü tərzdə tanıtmaq məqsədi daşıdığını bildirmiş, fotoların muəlliflərini təqdim etmişdir.

Vernisajda iştirak edən Azərbaycanın Fransadakı elçisi Elçin Əmirbəyov Azərbaycan Demokratik Respublikasının şanlı dövlətçilik ənənəmizi dirçəltməsindən iftixarla danışmış, onun tanınması üçün vaxtilə Paris konfransında ciddi müzakirələr aparıldığını xatırlatmışdır. Səfir tariximizə müstəqillik günü kimi daxil olmuş 28 Mayın, dünyanın harasında olur-olsun, hər bir soydaşımız üçün əziz və unudulmaz olduğunu qeyd etmişdir.

Azərbaycan Dostları Assosiasiyasının prezidenti Jan Fransua Mansel ölkəmizin dostluq əlaqələrinin getdikcə möhkəmləndiyini və belə tədbirlərin Azərbaycanı Fransada daha geniş tanıtdığını vurğulamışdır.

Mərasimdə Fransa Parlamenti və Senatının üzvləri, işgüzar aləmin təmsilçiləri, jurnalistlər və diaspor nümayəndələri iştirak etmişlər.

Mayın 31-dək  davam edəcək sərgidə Vuqar İbadov, Etibar Cəfərov və Kərim Abbasovun fotoları nümayiş olunur. Azərbaycanın rəngarəng təbiətini, zəngin memarlıq abidələrini əks etdirən lövhələri fransız seyricilər maraqla qarşılayırlar.

“Xalq qəzeti”