Təkcə müsəlman düyasının deyil, ümumilikdə, bütün dünyanın elm və ədəbiyyat tarixində özünəməxsus yeri olan böyük tarixçi, hərbçi, səyyah, poliqlot və şair Abbasqulu ağa Bakıxanovun xatirə lövhəsinin böyük avropalı alim Nikolay Kopernikin xatirə lövhəsi ilə yanaşı qoyulması barədə xəbər   hər bir azərbaycanlı üçün qürur mənbəyidir.

Ölkəmizin Polşadakı səfirliyindən mətbuata  verilən məlumata görə, lövhənin quraşdırılması ilə bağlı danışıqların aparılması məqsədilə Azərbaycanın bu ölkədəki səfiri Həsən Həsənov sözügedən rayona səfər edib.

Səfir səfər çərçivəsində Lubelski rayonunun rəhbəri Pavel Pikula, rayon idarə heyətinin üzvü Dariuş Qayo, təhsil və ictimai məsələlər üzrə direktor Beata Yanişevska-Brudiş və N.Kopernik adına məktəbin direktoru Eljbieta Kaşlikovska ilə görüşüb.

Görüşlərin nəticəsi olaraq xatirə lövhəsinin açılışı iyunun 6-na təyin edilib. Qeyd edək ki, həmin gün N. Kopernik adına məktəbdə hər il ənənəvi olaraq “Elm” günü kimi qeyd edilir. Bu il keçiriləcək tədbir azərbaycanlı alim, mütəfəkkir A.A.Bakıxanova həsr ediləcək.

Əfsanə MƏHƏMMƏDLİ,
“Xalq qəzeti”