Batumi Dövlət Universitetində bu münasibətlə keçirilən tədbirdə çıxış edən universitetin rektoru, professor Merabi Xalvaşi elmin və demokratiyanın inkişafına layiqli töhfələr vermiş azərbaycanlı alim Rza Talıbovu rəhbərlik etdiyi ali məktəbin kollektivi adından təbrik edib.

Rektor onun Batumi Dövlət Universitetinə gəlişindən məmnunluğunu ifadə edərək deyib: “Rza Talıbovun Acarıstan Muxtar Respublikası ilə Naxçıvan Muxtar Respublikası arasında ikitərəfli münasibətlərin möhkəmlənməsində, Batumi Dövlət Universiteti ilə Naxçıvan Dövlət Universiteti arasında əlaqələrin genişləndirilməsində, həmçinin elmin və təhsilin inkişafı istiqamətində mühüm xidmətləri vardır. Bütün bunları nəzərə alan Batumi Dövlət Universitetinin elmi şurası onu universitetin fəxri doktoru diplomuna layiq görüb.”

Rza Talıbova fəxri doktor diplomu və mantiya təqdim olunub.

“Batumi Dövlət Universiteti bu gündən mənim də universitetimdir”, - deyən Rza Talıbov Batumi Dövlət Universitetinin Elmi Şuranın üzvləri qarşısında çıxış edərək fəxri doktor diplomuna layiq görüldüyünə görə təşəkkür edib, bundan sonra da təhsil sahəsində əlaqələrin inkişafında səylərini əsrigəməyəcəyini bildirib.

Sonra tədbirdə Rza Talıbovun gürcü dilində çapdan çıxmış “Asiya ölkələri beynəlxalq münasibətlər sistemində” adlı kitabının təqdimatı olub.

Qeyd edək ki, Azərbaycan Respublikasının Təhsil Nazirliyinin dərslik kimi təsdiq etdiyi “Asiya ölkələri beynəlxalq münasibətlər sistemində” adlı kitab yüksək ali məktəblərdə dərslik kimi istifadə olunur. Kitab, MDB ölkələrinin bir çoxunun ali məktəblərində də tədris olunur.

“Xalq qəzeti”