Ulu öndər Heydər Əliyevin anadan olmasının 94-cü ildönümü ilə əlaqədar İqtisadiyyat Nazirliyinin Azərbaycan Mətbuat Şurası ilə birlikdə KİV nümayəndələri arasında təşkil etdiyi “Heydər Əliyev və iqtisadi islahatlar” mövzusunda yaradıcılıq müsabiqəsinin nəticələri açıqlanıb. Bu münasibətlə keçirilən tədbirdə bildirilib ki, İqtisadiyyat Nazirliyi tərəfindən belə müsabiqələr ənənəvi olaraq hər il reallaşdırılır. Builki müsabiqəyə isə 46 KİV tərəfindən 84 material təqdim edilib. Materiallar İqtisadiyyat Nazirliyində yaradılmış və Azərbaycan Mətbuat Şurasının da təmsil olunduğu müsabiqə komissiyası tərəfindən qiymətləndirilib və qaliblər müəyyənləşdirilib.  

Tədbirdə ulu öndər Heydər Əliyevin həyat və fəaliyyətinə həsr olunan film nümayiş etdirilib.

İqtisadiyyat nazirinin müavini Niyazi Səfərov müasir Azərbaycanın memarı Heydər Əliyevin ölkəmizin inkişafı üçün gördüyü mühüm işlərdən geniş bəhs edib, bu dahi şəxsiyyətin dövlətçiliyimizin möhkəmləndirilməsində və iqtisadiyyatımızın inkişafında əvəzsiz xidmətlərindən danışıb. Vurğulayıb ki, Heydər Əliyevin siyasi kursu möhtərəm Prezidentimiz İlham Əliyev tərəfindən qətiyyətlə və uğurla davam etdirilir, dünyada layiqli yerini tutan və regionun siyasi, iqtisadi və mədəni mərkəzinə çevrilən Azərbaycan bu gün inkişaf edir, siyasi sabitliyi, tolerantlığı, özünəməxsus iqtisadi inkişafı ilə seçilir.

Azərbaycan Mətbuat Şurasının sədri Əflatun Amaşov çıxışında ümummilli lider Heydər Əliyevin bütün sahələrdə olduğu kimi, mətbuatın inkişafına da böyük diqqət və qayğı göstərdiyini diqqətə çatdırıb.

Tədbirdə qaliblər elan olunaraq, onlara diplomlar və mükafatlar təqdim edilib.

Sonda ümummilli liderimizin yaradıcısı olduğu YAP sıralarına yeni qəbul edilən İqtisadiyyat Nazirliyinin əməkdaşlarına bu partiyanın   vəsiqələri təqdim olunub.

 “Xalq qəzeti”