Rusiyanın Krasnoyarsk diyarında Azərbycan mədəniyyəti günü keçirilib. “Odlar yurdu” mahnı və rəqs ansamblının yubileyinə həsr olunmuş mədəniyyət tədbiri Azərbaycanlıların Regional Milli-Mədəni Muxtariyyətinin dəstəyi ilə təşkil olunub.

Diasporla İş üzrə Dövlət Komitəsindən verilən məlumatda bildirilir ki, diaspor fəalı Səadət Qarayevanın təşəbbüsü və səyi ilə yaradılmış xalq ansamblı artıq 10 ildir ki, Azərbaycan mədəniyyətini və tarixini nəinki Sibirdə, eləcə də Rusiyanın digər regionlarında və dünyanın müxtəlif şəhərlərində layiqincə təmsil edir. Krasnoyarsk diyarında  demək olar bütün mədəni-kütləvi tədbirlərin iştirakçısı olan ansambl 2011-12-ci illərdə Türkiyədə qastrol səfərində olub, 2015-ci ildə isə kollektivin rəqqasları Tailandda çıxış ediblər.

Ansamblın yubileyi təntənəli konsert proqramı ilə qeyd olunub. Azərbaycan Dövlət Ansamblının solisti Rauf Zeynalov və “Odlar Yurdu” ansabmlının müəllimləri Aqil və Aysel Cəfərovlar, eləcə də Sənubər İsmayılovanın səhnələşdirdiyi “Sarı gəlin” xoreoqrafik tamaşası izləyicilərə təqdim edilib. Tamaşadan öncə isə Rusiya Azərbaycanlı Gənclər Birliyi (AMOR) Krasnoyarsk diyarı regional bölməsinin hazırladığı Azərbaycanın dekorativ incəsənətinə, ədəbiyyatına həsr olunmuş maraqlı sərgi və “Qarabağ çobanlarının rəqsi”, “Cücələr” və qadınların qavalla rəqsi kimi ansamblın sevilən nömrələrindən ibarət konsert proqramı hazırlanıb.

Tədbirdə Krasnoyarsk şəhərinin başçısı Edxam Akbulatov, Krasnoyarsk diyarı mədəniyyət nazirinin müavini Olqa Vasilenko, Krasnoyarsk diyarı Xalqlar dostluğu evinin direktoru Pyotr Suvorov, Əmək və anlaşma sarayının baş direktoru Valeri Xatkeviç və digər qonaqlar iştirak ediblər. “Odlar yurdu” ansamblının müəllim heyəti və bədii rəhbəri Krasnoyarsk diyarı ərazisində Azərbaycan mədəniyyətinin qorunması və inkişafında göstərdikləri xidmətlərə görə fəxri fərmanla təltif ediliblər.

Samirə Əliyeva,
“Xalq qəzeti”