Astara rayonunun Şiyəkəran kəndində dünyaya göz açan, məzunu olduğu bu kənd məktəbində 40 ildən bəri müəllimlik edən tanınmış şair, alim, filologiya üzrə fəlsəfə doktoru Mehman Qaraxanoğlunun 60 illik yubileyi qeyd olunub. 

AZƏRTAC xəbər verir ki, yubiley mərasimində yazıçı-publisist Hacı Nərimanoğlu, Əməkdar jurnalist Avdı Qoşqar, Əməkdar müəllim Hüseyn Şahbəndəyev, tanınmış pedaqoq Şakir Paşayev və başqaları çoxlu sayda şeir, ədəbi-tənqidi məqalə və esselər kitabının müəllifi olan Mehman Qaraxanoğlunun ədəbi, elmi-pedaqoji fəaliyyətindən danışıblar.

Qeyd olunub ki, M.Qaraxanoğlu mənsub olduğu talış xalqının mədəniyyətinin tədqiqatçısı olmaqla yanaşı, həm də cənub bölgəsində azərbaycançılıq ideologiyasının ardıcıl təbliğatçılarından biridir. O, “Multikulturalizm” jurnalının redaksiya heyətinin üzvüdür. “Kitabi-Dədə Qorqud” boylarını talış dilinə çevirib, cənub bölgəsi yazarlarının yaradıcılığından seçmələrin toplandığı almanaxların tərtibçi müəllifidir.