Ümumrusiya Kinematoqrafiya Universiteti ilə danışıqlar nəticəsində Mədəniyyət və Turizm Nazirliyinin vəsaiti hesabına cari ildə azərbaycanlı gənclərin bir neçəsi kino ixtisası üzrə bakalavr səviyyəsində təhsil almaq üçün Rusiyaya göndərilməsi planlaşdırılır. Bu barədə Nizami Kino Mərkəzində Mədəniyyət və Turizm Nazirliyi, Azərbaycan Respublikası Kinematoqrafçılar İttifaqı və Cəfər Cabbarlı adına “Azərbaycanfilm” kinostudiyasının gənclərə müraciəti ilə bağlı mətbuat konfransında məlumat verilib.

Bildirilib ki, azərbaycanlı tələbələr üçün kino və televiziya rejissoru ixtisası üzrə 2, kinooperator ixtisası üzrə  2, animasiya və kompüter qrafikası rejissoru ixtisası üzrə 1 yer ayrılıb.

“Azərbaycanfilm” kino-studiyasının direktoru Müşfiq Hətəmov qeyd edib ki, kinonun hər zaman peşəkarlara ehtiyacı var. Bu sahədə yeni nəslin formalaşmasında təhsilli gənclərin də öz rolu var. Bu gün Azərbaycanda da təhsil alan gənclərimiz var ki, onların kinoya baxışları müasirdir və belə rejissorların işi sayəsində Azərbaycan kinosu dünyanın bir çox ölkələrində nümayiş olunur. Amma dünya təcrübəsini öyrənməklə  gənclərimiz daha çox nailiyyət qazana bilərlər.

Mətbuat konfransında diqqətə çatdırılıb  ki, daha hazırlıqlı namizədləri müəyyən edib onları Moskvaya qəbul imtahanlarına göndərmək üçün Azərbaycan Kinematoqrafçılar İttifaqı və “Azərbaycanfilm” kinostudiyasının iştirakı ilə seçim komissiyası yaradılıb .

Məlumat  üçün bildirək ki, layihə “Azərbaycan kinosunun 2008-2018-ci illər üzrə inkişafına dair Dövlət Proqramı”na əsasən həyata keçirilir.

M.MÜKƏRRƏMOĞLU,
  “Xalq qəzeti”