Aprelin 28-də görkəmli oftalmoloq alim, Əməkdar elm xadimi, akademik Zərifə xanım Əliyevanın anadan olmasının 94 illiyi tamam olur. Nəsimi Rayon İcra Hakimiyyəti Azərbaycan Tibb Universiteti ilə birlikdə bu münasibətlə “İnsanlara nur bəxş edən alim” mövzusunda anım mərasimi keçirmişdir.

Toplantını giriş sözü ilə açan ATU-nun rektoru Gəray Gəraybəyli oftolmoloq-alim Zərifə Əliyevanın tibb elminin inkişafına mühüm töhfələr verməsini, oftalmologiyanın aktual problemlərinə dair sanballı tədqiqatları, elmi-pedaqoji və ictimai fəaliyyəti ilə həkimlərin yeni nəslinin yetişməsinə və Azərbaycanda oftalmologiya elminin inkişafına güclü təsir göstərdiyini qeyd etmişdir. Rektor bildirmişdir ki, görmə orqanının peşə patologiyası sahəsində apardığı elmi tədqiqat işlərinin uğurlu nəticələrinə görə akademik Zərifə Əliyeva keçmiş SSRİ-də oftalmologiya sahəsində ən mötəbər mükafat olan SSRİ Tibb Elmləri Akademiyasının M.İ.Averbax adına mükafatına layiq görülüb. Keçmiş SSRİ-də bu mükafatı alan ilk qadın alim kimi onun adı oftalmologiya elminin tarixinə düşüb.

Nəsimi Rayon İcra Hakimiyyətinin başçısı Asif Əsgərov Azərbaycanın görkəmli alimi, tibb elmləri doktoru, professor, əməkdar elm xadimi, Zərifə xanım Əliyevanın həyat və fəaliyyəti barədə geniş məlumat vermişdir. O qeyd etmişdir ki, akademik Zərifə xanım Əliyevanın ömür yolu Nəsimi rayonu ilə sıx bağlı olduğundan nəsimililər onun xatirəsini daim əziz tuturlar. Bu unudulmaz insanın anadan olmasının 94 illiyi ilə bağlı rayonda silsilə tədbirlər  təşkil olunmuşdur. Orta məktəblərdə görkəmli oftalmoloq, tibb elmləri doktoru Zərifə xanım Əliyevaya həsr olunmuş “Azərbaycan qadını” və “Ana  müqəddəslik zirvəsidir” mövzularında yazı və rəsm müsabiqələri keçirilmiş, onun ömür yoluna işıq salan ekspozisiyalar  yaradılmılşdır.

Başçı daha sonra qeyd etmişdir ki, azərbaycanlı akademik respublikamızda tibb elminin inkişafına mühüm töhfələr vermiş, oftalmologiyanın aktual problemlərinə dair tədqiqatları ilə nəinki keçmiş SSRİ məkanında, həmçinin dünya miqyasında böyük şöhrət qazanmışdır. Onun elmi-pedaqoji və ictimai fəaliyyəti həkimlərin yeni nəslinin yetişməsinə və Azərbaycanda oftalmologiya elminin inkişafına güclü təsir göstərmişdir. Ümummillli lider Heydər Əliyevin ömür-gün yoldaşı Zərifə Əliyeva görkəmli alim olmaqla yanaşı, həm də fəal ictimai xadim, qayğıkeş ana olmuşdur. Zərifə xanımın işıqlı obrazı yüksək vətənpərvərlik və humanizm rəmzi kimi həmişə bizimlə qalacaq, onun parlaq xatirəsi daim anılacaq, qədirbilən xalqımızın qəlbində əbədi yaşayacaqdır.

Azərbaycan Tibb Universitetinin oftalmologiya kafedrasının müdiri, professor Paşa Musayev  və ­kafedranın dosenti Solmaz Əliyeva Zərifə xanım Əliyevanın həyat və fəaliyyətinin müxtəlif məqamlarından söz açmış, onun Azərbaycan səhiyyəsinə verdiyi töhfələrin əhəmiyyətini yüksək dəyərləndirmişlər. Onlar bildirmişlər ki, Zərifə xanım Əliyeva təkcə çoxşaxəli elmi tədqiqat işləri aparmaqla kifayətlənməyib, yüksək ixtisaslı gənc alim kadrların yetişdirilməsinə və oftalmoloq-həkimlərin ixtisaslarının artırılması işinə də xüsusi diqqət yetirib. Taleyini tibb elminə həsr edən ­akademik Zərifə xanım Əliyeva oftalmologiyanın aktual problemlərinə dair tədqiqatlar aparıb, fədakar həkim kimi bir sıra göz xəstəliklərinin müalicəsində, o cümlədən Azərbaycanda traxomanın kökünün kəsilməsində böyük əmək sərf edib.

Nəsimi Rayon İcra Hakimiyyətinin təşəbbüsi ilə həmin gün fiziki qüsurlu şagirdlərin təhsil ­aldığı  11 və 268 saylı xüsusi məktəblərin şagirdlərinin Bioloji Təbabət Klinikasında pulsuz tibbi müayinəsi təşkil edilmişdir. Azərbaycan Tibb Universitetində keçirilən aksiyada isə müayinədən keçmiş uşaqlara eynəklər təqdim olunmuşdur.

T. AYDINOĞLU,
“Xalq qəzeti”