Ekologiya və Təbii Sərvətlər Nazirliyinin   mətbuat xidmətindən   bildirmişlər ki, akademik Həsən Əliyevin 110 illik yubileyi ilə əlaqədar olaraq il ərzində “Həsən Əliyev  və Azərbaycan təbiəti” mövzusunda elmi-praktik konfrans, akademik Həsən Əliyev adına 5 nominasiya üzrə müsabiqə, ali və orta təhsil müəssisələrində “Akademik Həsən Əliyev və ətraf mühitin mühafizəsi” adlı seminar-məşğələlər keçirilməsi nəzərdə tutulur.

Məlumatda bildirilir ki,  alimin xatirəsinin əbədiləşdirilməsi istiqamətində həyata keçiriləcək  mühüm tədbirlər sırasında “Akademik Həsən Əliyev adına aqromeşə massivi”nin salınması da  var.

Qeyd edək ki, Azərbaycan Prezidenti İlham Əliyev fevralın 7-də “Akademik Həsən Əliyevin 110 illik yubileyinin keçirilməsi haqqında" sərəncam imzalayıb. Bu, ölkə rəhbərliyinin Azərbaycanda ekologiya elminin inkişafına sanballı töhfələr vermiş böyük alimin elmi  və ictimai fəaliyyətinə verdiyi yüksək qiymətin əyani ifadəsidir.

Xatırladaq ki, görkəmli torpaqşünas alim, ictimai-siyasi xadim, kənd təsərrüfatı elmləri doktoru, professor, akademik, Əməkdar elm xadimi, Dövlət mükafatı laureatı Həsən Əlirza oğlu Əliyev 15 dekabr 1907-ci ildə anadan olub. Görkəmli alimin Azərbaycan təbiətinin, torpağının və suyunun mühafızəsi sahəsində xidmətləri əvəzsizdir.

M.MÜKƏRRƏMOĞLU,
“Xalq qəzeti”