Milli Məclisin deputatı, Avropa İttifaqı – Azərbaycan Parlamentlərarası Əməkdaşlıq Komitəsinin sədri Cavanşir Feyziyevin “Türk Dövlətləri Birliyi: Qlobal inteqrasiyanın Avrasiya modeli” adlı kitabı daha bir türkdilli ölkədə – Qırğızıstan Respublikasında qırğız dilində nəşr olunub. Monoqrafiyanı  Bişkek şəhərində “Turar” nəşriyyatı çap edib.

Türk dünyasının tarixi taleyindən, bu gün dünyada türk sivilizasiyasının varlığını təmin edən ümumtürk dəyərlərindən bəhs edən elmi-nəzəri araşdırmada  qloballaşma dövründə türk dünyasının qarşısında duran problemlərdən, müstəqil türk dövlətlərinin beynəlxalq siyasi-iqtisadi məkanda vahid platformadan çıxış etməsi zərurətindən də danışılır. Kitabda Türk Dövlətləri Birliyinin qlobal siyasi-iqtisadi, sosial-mədəni və humanitar birlik kimi təşəkkül tapmasının məqsədləri, prinsipləri və strategiyası irəli sürülür.

Xatırladaq ki, Azərbaycanda 2014-cü ildə işıq üzü görmüş bu fundamental nəşr həm ölkədə, həm də qardaş türk respublikalarında ciddi maraq doğurub. “Türk Dövlətləri Birliyi: Qlobal inteqrasiyanın Avrasiya modeli” kitabı  bugünədək türk, qazax, rus, boşnak və qırğız dillərinə çevrilərək, böyük tirajla yayılıb.

Keçən il Astanada keçirilən “Böyük Çöl” ictimai-siyasi elmlər forumunda Cavanşir Feyziyevin bu əsəri Beynəlxalq Türk Akademiyasının qızıl medalına layiq görülüb.

T.AYDINOĞLU,
“Xalq qəzeti”