Bu günlər  ölkəmizin hər yerində  Novruz bayramı  böyük təntənə ilə qeyd olunur. Bakı Slavyan Universitetində  də (BSU) Novruz bayramına həsr olunmuş möhtəşəm bayram tədbiri keçirildi. Bayramla əlaqədar BSU-nun foyesində fakültələr arasında “Xonça” müsabiqəsi keçirildi.

Universitetin rektoru, professor Nurlana Əliyeva Novruzun ölkəmiz və xalqımız üçün tarixi və mədəni əhəmiyyətindən danışaraq bildirdi ki, əsrlər boyu Azərbaycan xalqı bu bayramı qeyd etmiş, milli adət-ənənələri öz qəlbində yaşatmışdır: “Ümummilli lider Heydər Əliyevin təşəbbüsünün nəticəsi olaraq ölkəmiz illərdir Novruz bayramını geniş şəkildə - rəsmi dövlət bayramı kimi qeyd edir.Arzu edirəm ki, bu bayramı  Qarabağda təntənə ilə qarşılaya bilək. Dövlət başçısı İlham Əliyevin siyasəti, güclü iradəsi sayəsində tezliklə buna nail olacağımıza inanıram”.

Tədbir konsert proqramı ilə davam etdirildi. Bayram tədbirində “Xonça” müsabiqəsinin  qalibləri professor Nurlana Əliyeva tərəfindən mükafatlandırıldı. “Süfrə” nominasiyası üzrə beynəlxalq münasibətlər və regionşünaslıq fakültəsi, “Səməni” nominasiyası üzrə pedaqoji fakültə, “Novruz xonçası” nominasiyası üzrə əcnəbi tələbələrlə iş üzrə dekanlıq, “Novruz xalçası” nominasiyası üzrə Azərbaycan filologiyası və jurnalistika fakültəsi, “Bahar təravəti” nominasiyası üzrə tərcümə fakültəsi, “Novruz şamı” nominasiyası üzrə filologiya və xarici dil müəllimliyi fakültəsi, “Novruz dizaynı” nominasiyası üzrə magistratura şöbəsi qalib gələrək diplomla mükafatlandırıldı.

M.MÜKƏRRƏMOĞLU,
“Xalq qəzeti”