Fransanın  Ruayan şəhərində meriyanın və Azərbaycanın Dostları Assosiasiyasının  təşkilatçılığı, Azərbaycanın Fransadakı səfirliyinin və Paris Azərbaycan Evinin dəstəyi ilə Novruz bayramı münasibətilə şənlik keçirilmişdir.

 Şəhər meri Didiye Kantən təntənəli toplantıdan əvvəl Azərbaycanın Fransadakı səfiri Elçin Əmirbəyovu, Azərbaycanın Dostları Assosiyasiyasınin prezidenti, Fransa Parlamentinin üzvü,  Jan-Fransua Manseli və Paris Azərbaycan Evinin rəhbəri, Azərbaycanın Dostları Assosiyasiyasınin baş katibi Mirvari Fətəliyevanı qəbul  etmişdir. Görüşdə Elçin Əmirbəyov Azərbaycanın Fransa ilə əməkdaşlığa böyük önəm verdiyini qeyd edərək ölkəmizin mədəniyyətinə göstərilən diqqət üçün bütün meriya əməkdaşlarına təşəkkür etmişdir. O, Fransanın müxtəlif şəhərləri ilə dostluq və qardaşlıq sazişlərinin imzalandığını qeyd etmiş, Ermənistan-Azərbaycan, Dağlıq Qarabağ münaqişəsinin həllində Minsk qrupunun üzvü olan Fransanın rolundan­
danışmışdır.

Sonra Ruayan şəhərinin Konqreslər Sarayında Azərbaycanda turizmə aid film nümayiş etdirilmişdir. Toplantını açan mer D.Kantən Azərbaycan nümayəndə heyətini Ruayanda görməkdən şad olduğunu qeyd etmiş və hər iki ölkə arasında müxtəlif sahələrdə əlaqələrin inkişafından bəhs etmişdir.

J.F.Mansel Azərbaycanın Dostları Assosiasiyasının fəaliyyəti, Azərbaycanın tanıdılması üçün Fransanın müxtəlif regionlarında hər il bu kimi silsilə tədbirlərin uğurundan, eləcə də assosiasiyanın Azərbaycanı kəşf etmək üçün fransızlar üçün təşkil etdiyi səyahətlərdən danışmışdır.

Elçin Əmirbəyov isə şənlik iştirakçılarına Novruz bayramı haqqında məlumat verərək   bildirmişdir ki, birgə yaşayışı, sülhü təbliğ edən Novruz bayramı 2010-cu ildən BMT tərəfindən beynəlxalq bayram elan edilmişdir. Səfir Azərbaycanda multikulturalizm barədə də məlumat vermişdir.

Tədbirin sonunda Xalq artisti Yusif Qasımovun rəhbərlik etdiyi “Bakı ulduzları” rəqs ansamblı konsert proqramı ilə çıxış etmişdir. Azərbaycan rəqslərini 400-dən çox tamaşaçı böyük maraqla izləmişdir.

“Xalq qəzeti”