İtaliya və Azərbaycan mədəniyyət və turizm nazirliklərinin birgə “Mədəniyyət sektorunun siyasəti və idarə olunması sisteminin modernləşdirilməsində Azərbaycan Respublikasının Mədəniyyət və Turizm Nazirliyinə dəstək” Aİ Tvinninq layihəsindən irəli gələn məsələlərin həlli məqsədilə İtaliya Milli Kitabxanasının arxiv və fotoqrafiya şöbəsinin işçisi xanım Paola Puglisi Azərbaycan Milli Kitabxanasında olmuşdur. Qonağı kitabxananın direktoru professor Kərim Tahirov qəbul etmişdir.

Kitabxanaların idarə olunması istiqamətinin hüquqi əsaslarını müəyyənləşdirmək görüşün əsas məqsədi idi. “Kitabxana işi haqqında” Azərbaycan Respublikasının Qanunu ilə tanış olan xanım Puglisi kitabxanaların pulsuz məcburi nüsxələrlə təchizatı, milli biblioqrafiyanın tərtibi, Milli Kitabxananın elektron kataloqu, kiril və latın qrafikalı ədəbiyyatın kataloqda təsviri, dissertasiyaların mühafizəsi və istifadəsinin təşkili, kitab fondlarının mühafizəsi və qorunması, qədim ədəbiyyatın və nadir nüsxələrin rəqəmsallaşdırılması, Milli Kitabxananın maliyyələşdirilməsi yolları və s. məsələlər maraqlandırmışdır.

Sonra xanım  Puglisi kitabxanada gedən avtomatlaşdırma prosesi və elektron kataloqla tanış olmuşdur.

Azərbaycan Milli Kitabxanası “Fotoalbom” (Azərbaycan, ingilis və rus dillərində), “Azərbaycan mətbəxi” (ingilis dilində), mədəniyyət obyektlərini özündə əks etdirən xəritə, Azərbaycan xalçaları dünya kolleksiyalarında” (Azərbaycan və ingilis dillərində)  kitabları qonağa hədiyyə edilmişdir.

M.MÜKƏRRƏMOĞLU,
“Xalq qəzeti”