Azərbaycan və İtaliya mədəniyyət və turizm nazirliklərinin birgə “Mədəniyyət sektorunun siyasəti və idarə olunması sisteminin modernləşdirilməsində Azərbaycan Respublikasının Mədəniyyət və Turizm Nazirliyinə dəstək” layihəsindən irəli gələn məsələlərin həlli məqsədilə İtaliyadan  gəlmiş  menecer Jurgen Assfalg, layihə üzrə assistent Səbinə Yadullayeva Milli Kitabxanada olmuşlar.

İnformasiya texnologiyaları üzrə menecer Jurgen Assfalg mədəniyyət sektorunda rəqəmsallaşmanın vəziyyəti, mövcud proseslərlə maraqlanmışdır. Milli Kitabxananın direktoru, professor Kərim Tahirov kitabxananın 2000-ci ildə Virtua avtomatlaşdırılmış sistemə qoşulması, bütün kitabxana proseslərinin avtomatlaşdırılması, elektron kitabxana, elektron kataloq, virtual biblioqrafik xidmət imkanları barədə qonaqlara ətraflı məlumat verdi. Bildirdi ki, Mədəniyyət və Turizm Nazirliyi ilə Milli Kitabxananın birgə layihəsi əsasında ULTRA şirkəti tərəfindən 2010-cu ildə tərtib olunmuş ALİSA proqramı artıq 2 ildir Bakı şəhər kitabxanalarında və 30 rayon MKS-də tətbiq edilir. Bu proqramdan cari ilin sonunadək bütün rayon kitabxanalarında  istifadə olunacaq.

Proqramın imkanları ilə tanış olduqdan sonra J.Assfalga ALİSA-nın dünya standartlarına cavab verən proqramlar əsasında yazıldığını, Virtua ilə sinxronlaşdırıldığını, kitabxanalarda əvvəllər mövcud olan İRBİS proqramında yazılmış bütün bazaların artıq ALİSA-ya inteqrasiya olunduğunu, onun yaxın gələcəkdə çox mükəmməl proqrama çevriləcəyini bildirdi.

Sonda layihəyə əsasən J.Assfalg Milli Kitabxananın avtomatlaşdırılma proseslərinin daha da təkmilləşdirilməsi barədə təkliflərini təqdim edəcəyini bildirdi.

M.MÜKƏRRƏMOĞLU,
“Xalq qəzeti”