Avrasiya Beynəlxalq Araşdırmalar İnstitutu İstanbul Türk Ocaqları və İstanbul Universiteti ilə birlikdə Azərbaycanın və türk dünyasının böyük şairi Şəhriyarın 110 illik yubileyi ilə bağlı İstanbulda konfrans keçirəcək. Bu barədə lent.az saytı məlumat yayıb.

Türkiyənin Mədəniyyət və Turizm Nazirliyinin də dəstəklədiyi və İstanbul Universitetində keçiriləcək konfransda ustad Şəhriyarın Azərbaycan və türk ədəbiyyatındakı böyük rolu ilə bağlı məruzələr dinləniləcək.

Konfransın sonunda keçiriləcək ədəbi-bədii hissədə isə Şəhriyar yaradıcılığından seçmələr səsləndiriləcək, əsərlərinə bəstələnmiş mahnılar ifa olunacaq.

Tədbirdə Azərbaycandan və qardaş Türkiyədən başqa türk dünyasının digər bölgələrindən də alimlər, şairlər, yazıçılar, jurnalistlər iştirak edəcəklər.

M.MÜKƏRRƏMOĞLU, 
“Xalq qəzeti”