Azərbaycan İstiqlal Muzeyində 20 Yanvar faciəsinin  27-ci ildönümünə həsr olunmuş “Keçmişi unutmayaq!” adlı sərgi-tədbir keçirildi.

Azərbaycan İstiqlal Muzeyi, Azərbaycan Dövlət Rəssamlıq Akademiyasının nəzdində İncəsənət Kolleci və Maarifçilik Akademiyası ilə birgə təşkil olunmuş sərgidə tələbələrin və yaşlı rəssamların 20 Yanvar faciəsini əks etdirən 40-a yaxın əsəri nümayiş olunub.

Tədbirdə Azərbaycan İstiqlal Muzeyinin direktoru Fəridə Şəmsi çıxış edərək bildirdi ki, 1990-cı il yanvar ayının 19-dan 20-nə keçən gecə keçmiş Sovet İttifaqının qoşun hissələri fövqəladə vəziyyət elan etmədən Bakı şəhərinə daxil olmuş və dinc əhaliyə divan tutmuşdur. Milli azadlıq, ölkəsinin ərazi bütövlüyü uğrunda mübarizəyə qalxmış xalq kütləvi terrora məruz qalmış, yüzlərlə günahsız insan qətlə yetirilmiş və yaralanmışdır. Bu gün həmin  qanlı  hadisələr  rəssamlarımızın əsərlərində  dolğun əksini tapıb.  Bu sərginin  məqsədi  də
20 Yanvar  qətliamını bir daha xatırlatmaqdır.

Tələbələr, rəssamlar, Sərhəd Qoşunlarının, Hərbi Dəniz Qüvvələrinin şəxsi heyəti, Milli Qvardiyanın əsgərləri və digər qonaqlar tədbirdə  iştirak etmişlər.

M.MÜKƏRRƏMOĞLU,
“Xalq qəzeti”