Azərbaycan Respublikasının dövlət müstəqilliyinin bərpasının 25-ci ildönümünə həsr edilən jurnalistlər arasında “Heydər Əliyev və müstəqil Azərbaycan” adlı məqalə müsabiqəsinin qalibləri mükafatlandırılmışdır. Müsabiqə Gənclər və İdman Nazirliyinin dəstəyi ilə Dünya Türk Gənclər Birliyi və Azərbaycan Gənclərinin Demokratik İnkişafa Yardımı ictimai birlikləri tərəfindən keçirilib.  Mükafatlandırma mərasimi dövlət himninin səsləndirilməsi ilə başlanıb.

 Tədbirdə çıxış edən Dünya Türk Gəncləri Birliyinin sədri Əkrəm Abdullayev bildirib ki, müstəqilliyi qoruyub saxlamaq, onu qazanmaqdan qat-qat çətindir. Azərbaycanın əldə etdiyi müstəqillik çox çətin başa gəlmiş olsa da, xalqımız ulu öndər Heydər Əliyevin rəhbərliyi ilə bu müstəqilliyi qoruyub saxlaya bilib, tarixin ən ağır sınaqlarından uğurla çıxmağa nail olub.

Sonra çıxış edən gənclər və idman nazirinin müavini İntiqam Babayev  müasir Azərbaycan dövlətçiliyinin banisi ümummilli lider Heydər Əliyevin tarixi xidmətlərindən danışıb və gənclərimizin onun miras qoyduğu yolda olduğunu diqqətə çatdırıb. O qeyd edib ki, müsabiqə jurnalistlər arasında peşəkarların müəyyən olunması, müstəqilliyimizin 25 illiyində Heydər Əliyevin qələm nümayəndələri tərəfindən bir daha yad edilməsi baxımından əhəmiyyətlidir.

Tədbirdə daha sonra Milli Məclisin deputatı Fuad Muradov, Prezident Administrasiyası ictimai-siyasi məsələlər şöbəsinin gənclər təşkilatları ilə iş sektorunun müdiri Vüsal Quliyev, Azərbaycan Yazıçılar Birliyinin katibi, “525-ci qəzet”in baş redaktoru Rəşad Məcid və digər ziyalılar çıxış edərək, müstəqilliyimizin bərpası və möhkəmləndirilməsində ümummilli liderin rolundan və jurnalistlər arasında keçirilən bu müsabiqənin vacibliyindən danışıblar.

Diqqətə çatdırılıb ki, müsabiqəyə noyabrın 14-də start verilib. Yazılar nömrələnərək, anonim şəkildə münsiflərə təqdim olunub və qalib müvafiq qiymətləndirməyə əsasən müəyyənləşdirilib. Müsabiqənin xüsusi şərti isə ondan ibarət idi ki, jurnalistlərdən yeni yazı tələb olunmurdu. Yəni, jurnalistlər 2016-cı il ərzində bu mövzuda dərc edilən yazılarını müsabiqəyə təqdim edə bilərdilər.

 Sonra mükafatlandırma mərasimi keçirilib. Bizim üçün xoş olan bir məqam da bu oldu ki, “Xalq qəzeti”nin əməkdaşı Anar Turan “Azərbaycançılıq milli ideyasında Heydər Əliyev fenomeni” adlı məqaləsinə görə I yerə layiq görülüb.

Əfsanə Bayramqızı,
“Xalq qəzeti”