Bu yaxınlarda Hindistanda keçirilmiş V Dehli Beynəlxalq Film Festivalının müsabiqə proqramında Mədəniyyət və Turizm Nazirliyinin dəstəyi ilə “Azərbaycanfilm” kinostudiyasında istehsal edilən “Dərs” və “Onun atası” bədii filmləri nümayiş olunmuşdur.

“Dərs” tammetrajlı bədii filminin ssenari müəllifləri Elza Ağayeva və Anastasiya Volkova, quruluşçu rejissorları Rafiq Əliyev və Cavid Təvəkkül, quruluşçu operatoru Rauf Qurbanəliyev, quruluşçu rəssamı Fikrət Ələkbərov, bəstəkarı Tünzalə Ağayeva, icraçı prodüseri Vüsal Abbasov, prodüseri Müşfiq Hətəmovdur.

Film Rusiyada 25-ci “Kinoşok”, Belarusda 23-cü “Listapad” festivallarının mükafatlarına layiq görülmüşdür.

“Onun atası” bədii filmi “40-cı paraleldə” kinoalmanaxına daxil olan qısametrajlı filmlərdən biridir. Ssenari müəllifi Zamin Məmmədov, quruluşçu operatoru Əli Sultanov, quruluşçu rəssamı Arif Niftiyev, icraçı prodüseri Rəhim Sadıqov, prodüseri Müşfiq Hətəmovdur.

“İçərişəhər” bədii filminin Hindistanın 21-ci Kerala Beynəlxalq Film Festivalının “Dünya kinosu” proqramında nümayişi baş tutub. Festival  dekabrın 9-dan 16-dək Keralada keçirilib.

Film Mədəniyyət və Turizm Nazirliyinin sifarişi ilə Cəfər Cabbarlı adına “Azərbaycanfilm” kinostudiyasında lentə alınıb.

“İçərişəhər” filmi,  həmçinin Misirin 38-ci Qahirə Beynəlxalq Film Festivalı, 47-ci Hindistan Beynəlxalq Film Festivalı (Qoa) və 20-ci Tallin “Qaranlıq gecələr” Film Festivalında nümayiş olunub. Təhminə Rafaella filmdəki ifasına görə Türkiyənin 5-ci “Van gölü” Beynəlxalq Film Festivalının “Ən yaxşı aktrisa” mükafatına layiq görülüb.

Psixoloji dram janrında lentə alınan filmin ideya müəllifi Təhminə Rafaella, ssenari müəllifləri Təhminə Rafaella və İlqar Safat, quruluşçu rejissoru İlqar Safat, quruluşçu operatoru Luka Koassin, quruluşçu rəssamı Bütünay Haqverdiyev, icraçı prodüseri Ülvi Qasımov, prodüseri Müşfiq Hətəmovdur.

Rejissor Mirbala Səlimlinin “Qırmızı bağ” bədii filmi isə Bolqarıstanda keçiriləcək VIII “Sofia Menar” beynəlxalq festivalına dəvət alıb.

“Azərbaycanfilm” kinostudiyasından verilən məlumata görə, festival yanvarın 12-dən 29-dək Sofiya şəhərində keçiriləcək.

Azərbaycan filmi ilk dəfə bu festivalda iştirak edəcək. Festival regionun ən diqqətəlayiq yeni ekran əsərlərini Avropa tamaşaçısına təqdim edir, yerli auditoriyanı İslam dünyasının iddialı audiovizual əsərləri ilə tanış edir.

M.MÜKƏRRƏMOĞLU,
  “Xalq qəzeti”