İtaliyanın Florensiya şəhərində Azərbaycan Memarlıq və İnşaat Universitetinin və bu ölkənin Romualdo del Bianko Fondunun təşkilatçılığı ilə “Auditorium al Duomo” salonunda sərgi və mühazirə keçirilib. Fondun prezidenti Paolo del Biankonun dəvəti ilə Azərbaycan Memarlıq və İnşaat Universitetinin rektoru, professor  Gülçöhrə Məmmədova  sərgidə iştirak edib.

Sərgidə Azərbaycanın İtaliyadakı fövqəladə və səlahiyyətli səfiri Məmməd Əhmədzadə, səfirliyin əməkdaşları, İtaliya Texniki Universitetinin müəllim və tələbələri, bu ölkənin mədəniyyət və incəsənət xadimləri, elmi dairələrin və yerli hakimiyyət orqanlarının nümayəndələri, memarlar  iştirak ediblər.  

Romualdo Del Bianko Fondunun direktoru Pauolo Del Bianko fond tərəfindən həyata keçirilən tədbirlər arasında Azərbaycan memarlığına həsr edilmiş tədbirlərin xüsusi önəm daşıdığını  bildirib. Rəhbərlik etdiyi fondun 30-dan çox ölkə ilə əlaqəsinin mövculuğunu vurğulayan direktor Azərbaycan Memarlıq və İnşaat Universiteti ilə fond arasında əməkdaşlığın 13 ildən artıq davam etdiyini, bu əməkdaşlığın təməlinin məhz Florensiyanın “Auditorium al Duomo” Mərkəzində qoyulduğunu diqqətə çatdırıb. Azərbaycanın zəngin mədəni irsindən, nadir memarlıq nümunələrindən bəhs edən fondun direktoru bu sərginin Azərbaycan memarlıq irsinin İtaliya ictimaiyyətinə nümayiş etdirilməsində əlavə bir vasitə olduğunu bildirib.

Azərbaycanın İtaliyadakı səfiri Məmməd Əhmədzadə çıxış edərək Azərbaycanın zəngin mədəniyyəti, tarixi ənənələri, multikulturalizm modeli, sosial-iqtisadi inkişafı, ölkəmizdə həyata keçirilən önəmli iqtisadi, infrastruktur və memarlıq layihələri, o cümlədən mədəni irsin qorunması sahəsində əldə edilmiş uğurlar haqqında məlumat verib. Sərginin əhəmiyyətindən danışan M.Əhmədzadə nümayiş etdirilən məlumat lövhələrinin Azərbaycanda həyata keçirilən layihələrlə bağlı ilkin təsəvvür yaratdığını deyib, həmin layihələrlə canlı tanış olmaq üçün tədbir iştirakçılarını Azərbaycana dəvət edib.

AzMİU-nun rektoru, Gülçöhrə Məmmədova rəhbərlik etdiyi universitetlə Romualdo Del Bianko Fondu arasında əməkdaşlığın tarixindən danışıb. Rektor istər Bakıda, istərsə də Florensiyada birgə çoxsaylı tədbirlər təşkil edildiyini, səmərəli əməkdaşlığa görə fondun prezidenti Paolo Del Biankoya təşəkkürünü bildirib.

AzMİU-nun memarlıq fakültəsinin müəllimi Fərid Əliyev Bakının müasir memarlıq nümunələri haqqında geniş təqdimatla çıxış edib,  “Bakının müasir memarlığı” mövzusunda mühazirə oxuyub.

Təqdimatda Bakının müasir memarlıq nümunələri – “Alov” qülləsi, Olimpiya stadionu, Heydər Əliyev Mərkəzi, Bulvar otel, Hava limanı, “Ağ şəhər” kompleksi, Heydər məscidi, SOCAR-ın binası və digər müasir tikililər nümayiş olunub, hər biri haqqında geniş məlumat verilib. O, hər bir layihənin konsepsiyası, texniki tərəfləri, eləcə də Bakının sosial, iqtisadi və mədəni həyatındakı rolu barədə danışıb.

V.BAYRAMOV, 
“Xalq qəzeti”