Milli Kitabxanada dünya şöhrətli musiqi xadimi, görkəmli müğənni və tanınmış ictimai xadim, SSRİ-nin və Azərbaycan Respublikasının Xalq artisti, SSRİ-nin və Azərbaycan Respublikasının Dövlət mükafatları laureatı, Sosialist Əməyi Qəhrəmanı Rəşid Məcid oğlu Behbudova həsr olunmuş fotoalbomun və “Rəşid Behbudov. Biblioqrafiya”  kitabının təqdimat mərasimi keçirilmişdir. 

Tədbir sənətkar haqqında filmin  nümayişi ilə başladı. Sonra Milli Kitabxananın direktoru, professor Kərim Tahirov  çıxış edərək Milli Kitabxananın nəşri olan biblioqrafiyadan söz açdı. Direktor bildirdi ki, burada R.Behbudov barədə rəsmi sənədlər, sənətkarın əsərləri, həyat və yaradıcılığı haqqında dövrü mətbuatda və məcmuələrdə çap olunan məqalələr yer almışdır.

Mədəniyyət və turizm nazirinin müavini, professor Ədalət Vəliyev   əvvəlcə dünya şöhrətli müğənninin anadan olmasının 100 illiyi ilə bağlı keçirilən silsilə tədbirlərdən danışmış, müğənninin yaradıcılığından, onun  kino sahəsindəki fəaliyyətindən ətraflı bəhs etmişdir.

Milli Konservatoriyanın rektoru, Xalq artisti Siyavuş Kərimi,  Azərbaycan Bəstəkarlar İttifaqının katibi, Əməkdar incəsənət xadimi Sərdar Fərəcov, müğənni, Xalq artisti Mübariz Tağıyev, saksofon ifaçısı, Əməkdar incəsənət xadimi Rafiq Seyidzadə Rəşid Behbudovla bağlı xoş xatirələrini bölüşmüşlər.

R.Behbudovun  ailəsi adından Kamil Şahverdiyev Mədəniyyət və Turizm Nazirliyinə, Milli Kitabxanaya, tədbir iştirakçılarına təşəkkürünü bildirmişdir.

M.MÜKƏRRƏMOĞLU,
“Xalq qəzeti”