Nüfuzlu tripadvisor.com səyahət məsləhətçisi saytının ötən ilin oktyabrından bu ilin oktyabrına qədərki müddət üçün apardığı rəy sorğusunda daha çox üstünlük verilən və inkişaf etməkdə olan turizm məntəqələri siyahısında Bakı şəhəri beşinci yerdə qərarlaşıb. Bu sayt artıq 5-ci ildir ki, daha çox üstünlük verilən və inkişaf etməkdə olan turizm məntəqələrinin reytinq sıralamasını açıqlayır.

Mədəniyyət və Turizm Nazirliyinin mətbuat xidmətindən  verilən  məlumatda deyilir ki, reytinq siyahısı 43 istiqamət üzrə xüsusi uçuşlar, mehmanxana və restoranların bron edilməsi və artan turist maraqları əsasında hazırlanıb.

 Saytın Asiya-Sakit okean regionu üzrə kommunikasiyalar direktoru  Janis Li Fanq reytinq sıralamasında önə çıxan şəhərlərin 2017-ci ildə də səyahət üçün üstünlük verilən məntəqələr arasında olacağına ümid etdiyini bildirib. Əlavə edib ki, bu siyahı səyahətsevərlərin seçimlərinə öz müsbət təsirini göstərəcək.  O, həmçinin ölkəmiz və paytaxtımız haqqında da xoş təəssüratlarını bölüşüb: “Biz çox məmnunuq ki, Bakı populyarlaşmaqda olan turizm məntəqələri siyahısında ön sıralarda dayanır. Səyahət sevərlərin 65 faizi Azərbaycanı Şərqlə Qərbin qovşağında yerləşən qədim tarixə və möhtəşəm mədəniyyətə malik ölkə kimi səciyyələndirirlər. Ümidvaram ki, bu gözəl şəhəri 2017-ci ildə də görmək istəyənlərin sayı çox olacaq”.

Onu da  qeyd edək ki, siyahıda San-Xose-del-Kabo (Meksika), Uistler (Kanada), Jijoka de Jerikuakuara (Braziliya) və Kihei (Havay, ABŞ) kimi məşhur turist ünvanları yer alıb.

Saytın təqdim etdiyi onluqda, həmçinin El-Nido (Filippin), Eylat (İsrail), Las-Palmas (İspaniya), Tbilisi (Gürcüstan) və Jodhpur (Hindistan) kimi şəhərlərin də adları yer alır.

M. MÜKƏRRƏMOĞLU, 
“Xalq qəzeti”