Mədəniyyət və Turizm Nazirliyinin təşkilatçılığı ilə Azərbaycan Milli Kitabxanasının və Beynəlxalq Muğam Mərkəzinin birgə “Sirlər xəzinəsi” layihəsinə start verilmişdir.

Layihəyə əsasən, Milli Kitabxanada klassiklərin yaradıcılığına həsr olunmuş silsilə ədəbi-bədii musiqili məclislər keçiriləcəkdir. Bu silsilədən ilk tədbir klassik Azərbaycan poeziyasının fəxri Məhəmməd Füzulinin yaradıcılığına həsr olunmuşdur.

Tədbiri Milli Kitabxananın direktoru, professor Kərim Tahirov açaraq bu məclisin füzulişünas, poeziya həvəskarları və musiqisevərlər üçün bir töhfə olduğunu vurğulamışdır. Beynəlxalq Muğam Mərkəzinin direktoru Murad Hüseynov isə Milli Kitabxanada belə tədbirlərin keçirilməsini alqışlamış və layihənin uğurla davam etməsini arzulamışdır.

Poeziya və musiqinin vəhdətindən ibarət tədbirdə klassik ədəbiyyatımızın görkəmli tədqiqatçıları, akademik Teymur Kərimli, AMEA-nın müxbir üzvü Nizami Cəfərov, Mədəniyyət və İncəsənət Universitetinin prorektoru, professor Gülşən Əliyeva, Pedaqoji Universitetin filologiya fakültəsinin dekanı, professor Buludxan Xəlilov, Yazıçılar Birliyinin Qarabağ şöbəsinin müdiri, professor Ənvər Əhməd və digər füzulişünas alimlərin çıxışları dinlənilmiş, Əməkdar artist Azad Şükürovun ifasında  Füzuli şeirləri səslənmiş, məclis boyu Əməkdar incəsənət xadimi Aqil Məlikov, Əməkdar artistlər  Qəzənfər Abbasov, Feyruz Səxavət, Ehtiram Hüseynov, Hüseyn Məlikovun ifasında şairin qəzəlləri oxunmuşdur.

Füzulinin zəngin yaradıcılığını özündə əks etdirən kitab sərgisi tədbir iştirakçıları tərəfindən maraqla qarşılanmışdır.

M.MÜKƏRRƏMOĞLU, 
“Xalq qəzeti”