“İçərişəhər” bədii filmi dekabr 9-dan 16-dək XXI Kerala Beynəlxalq Film Festivalında göstəriləcək. Film festivalın “Dünya kinosu” proqramı çərçivəsində nümayiş olunacaq.

Azərbaycan Respublikası Mədəniyyət və Turizm Nazirliyinin sifarişi ilə Cəfər Cabbarlı adına “Azərbaycanfilm” kinostudiyasında lentə alınan “İçərişəhər” filmi Misirin 35-ci Qahirə, 47-ci Hindistan (Qoa) və 20-ci Tallin “Qaranlıq gecələr” beynəlxalq film festivallarına da dəvətlidir.

Psixoloji dram janrında lentə alınan filmin ideya müəllifi Təhminə Rafaella, ssenari müəllifləri Təhminə Rafaella və İlqar Safat, quruluşçu rejissoru İlqar Safat, quruluşçu operatoru Luka Koassin, quruluşçu rəssamı Bütünay Haqverdiyev, icraçı prodüseri Ülvi Qasımov, prodüseri Müşfiq Hətəmovdur.

Filmdə baş rollara Təhminə Rafaella, Firdovsi Atakişiyev, Mehriban Zəki, Elmira Şabanova və başqaları çəkilmişlər.

M.MÜKƏRRƏMOĞLU,
  “Xalq qəzeti”