Nizami Gəncəvi Beynəlxalq Mərkəzinin (NGBM) həmsədri, Misirin İsgəndəriyyə Kitabxanasının direktoru, doktor İsmail Seragəldin Bolqarıstan Prezidentinin mükafatı ilə təltif olunub.

Diasporla İş üzrə Dövlət Komitəsindən aldığımız məlumatda deyilir ki, Bolqarıstan Respublikası Prezident sarayında Prezident Rosen Plevneliev, Bolqarıstanın sabiq prezidenti Petar Stoyanov, NGBM-in Baş katibi Rövşən Muradov, Azərbaycan və Misirin Bolqarıstandakı səfirlərinin iştirakı ilə mükafatın təqdimat mərasimi keçirilib. Bolqarıstan Prezidenti Rosen Plevneliev doktor İsmail Seragəldinin NGBM-in həmsədri kimi göstərdiyi önəmli fəaliyyətini vurğulayıb.

İsmail Seragəldin Sofiya Universitetinin Fəxri Doktorluq Diplomu ilə də təltif edilib.

NGBM Bolqarıstan hökuməti və ictimai qurumları ilə fəal əməkdaşlıq edir. Belə ki, cənab Rosen Plevneliev mərkəzin təşkil etdiyi 3-cü və 4-cü Qlobal Bakı forumlarında, təşkilatın Ali Səviyyəli toplantılarında iştirak edib və Sofiyada  toplantılara ev sahibliyi edib.

Bolqarıstanın sabiq Prezidenti Petar Stoyanov Mərkəzin İdarə Heyətinin üzvü, eks-prezident Georgi Parvanov və keçmiş baş nazir Petre Roman isə üzvləridir.

Samirə Əliyeva,
“Xalq qəzeti”