Son illər Azərbaycan filmləri  beynəlxalq kinofestivallarda uğurla nümayiş etdirilir. Noyabr ayında isə  daha iki  filmimiz  müxtəlif beynəlxalq kinofestivallara dəvət alıb. “Azərbaycanfilm” kinostudiyasının  istehsalı olan “Dərs” filmi noyabrın 4-dən 11-dək  “Listapad” Minsk Beynəlxalq Film Festivalında “Listapadik” uşaq filmləri müsabiqə proqramına salınmışdır.  “Listapadik” müsabiqə proqramında Azərbaycanla yanaşı, Belçika, Bolqarıstan, Almaniya, Fransa və ABŞ filmləri yer alıb.

Qeyd edək ki, “Dərs” tammetrajlı bədii filmi Azərbaycan Respublikası Mədəniyyət və Turizm Nazirliyinin dəstəyi ilə lentə alınmışdır.

Filmin beynəlxalq təqdimatı   34-cü Münhen Film Festivalında baş tutmuşdur. “Dərs” Rusiyanın 25-ci “Kinoşok” beynəlxalq film festivalının “KinoMalıŞok” proqramının “Ən yaxşı film” nominasiyasında qalib olub.

Filmin rejissorları Rafiq Əliyev və Cavid Təvəkkül, ssenari müəllifləri Elza Ağayeva və Anastasiya Volkova, quruluşçu operatoru Rauf Qurbanəliyev, quruluşçu rəssamı Fikrət Ələkbərov, bəstəkarı Tünzalə Ağayeva, icraçı prodüseri Vüsal Abbasov, prodüseri Müşfiq Hətəmovdur.

“İçərişəhər” tammetrajlı bədii filmi isə 47-ci Hindistan Beynəlxalq Film Festivalına dəvət alıb. Festival 20-28 noyabr tarixlərində Qoada keçiriləcək. Film Azərbaycan Respublikası Mədəniyyət və Turizm Nazirliyinin dəstəyi ilə Cəfər Cabbarlı adına “Azərbaycanfilm” kinostudiyasında lentə alınmışdır.

Qeyd edək ki, “İçərişəhər” 35-ci Qahirə Beynəlxalq Film Festivalı və Türkiyədə 5-ci Van gölü Beynəlxalq Film Festivalında da nümayiş etdiriləcək.

Filmin ideya müəllifi Təhminə Rafaella, ssenari müəllifləri Təhminə Rafaella və İlqar Safat, quruluşçu rejissoru İlqar Safat, quruluşçu operatoru Luka Koassindir.

M.MÜKƏRRƏMOĞLU,
“Xalq qəzeti”