Yaponiyanın paytaxtı Tokioda ölkəmiz haqqında “Azərbaycan – Odlar yurdu” adlı yeni bələdçi nəşrin təqdimatı keçirilib. Tədbirdə Yaponiyanın  iş adamaları ilə yanaşı, bu ölkədəki Azərbaycan diasporunun üzvləri, kütləvi-informasiya vasitələrinin nümayəndələri iştirak ediblər.

Diasporla İş üzrə Dövlət Komitəsindən aldığımız məlumatda bildirilir ki, nəşrin müəllifi, “Bross Border Club” şirkətinin prezidenti Kazuyası İşida bildirib ki, Azərbaycan Respublikasının Mədəniyyət və Turizm Nazirliyinin və ölkəmizin Yaponiyadakı səfirliyinin köməyi ilə yapon dilində buraxılan nəşrin məqsədi yapon turizm həvəskarlarını regionun lider dövləti olan Azərbaycan haqqında daha ətraflı məlumatlandırmaqdır.

Azərbaycanın dövlət müstəqilliyinin bərpası gününə təsadüf edən təqdimat mərasimində K.İşida bu tarixi günü xüsusi vurğulayaraq bildirib ki, sürətli və dinamik inkişafı ilə bütün dünyanın diqqətini çəkən Azərbaycan füsunkar təbiəti, tarixi abidələri, zəngin mədəniyyəti və müsair tikililəri ilə turizm həvəskarlarını özünə cəlb edir. O, yüksək çap keyfiyyəti və ətraflı məlumatı ilə seçilən bu nəşrin yapon iş adamlarının və turizm həvəskarlarının ölkəmiz haqqında ətraflı məlumat əldə etməsinə şərait yaradacağını qeyd edib.

“Yaponiya–Azərbaycan Dostluq Mərkəzi”nin sədri Xəlil Kələntər çıxış edərək tədbirə toplaşan çoxsaylı iş adamlarına minnətdarlığını bildirib. X.Kələntər Azərbaycanın bütün dünyada etibarlı tərəfdaş kimi tanındığını, burada xarici investisiyaların tətbiqi üçün böyük imkanlar yaradıldığını vurğulayıb. Qeyd olunub ki, Prezident İlham Əliyevin müdrik siyasəti sayəsində Azərbaycan regionda lider dövlətə çevrilmişdir. Tədbirdə yapon iş adamlarını maraqlandıran konkret istiqamətlər üzrə fikir mübadiləsi aparılmışdır.

Samirə Əliyeva,
“Xalq qəzeti”