Azərbaycanın Rusiya ilə mədəni əlaqələri son illər daha intensiv xarakter almışdır. Teatr, kino, muzey işi, musiqi  və sair incəsənət  sahələrində  mövcud əməkdaşlıq tarixi ənənələri olan  mədəni  əməkdaşlığın inkişafına  yeni töhfələr verir.

 Dünən Nizami Kino Mərkəzində Rusiya Federasiyası Mədəniyyət Nazirliyinin dəstəyi, Azərbaycan Respublikası Mədəniyyət və Turizm Nazirliyi, Rusiyanın Azərbaycandakı səfirliyi, “Kinofest” Prodüser Mərkəzi və Nizami Kino Mərkəzinin təşkilatçılığı ilə  açılış mərasimi keçirilən Rusiya Kinosu Günləri də  bu əlaqələrin yeni  nümunəsidir.

Açılış mərasimində Rusiya kinematoqrafiyasının məşhur simaları--rejissor və prodüser Renat Davletyarov, aktrisa Yevgeniya Malaxova (Davletyarova), rejissor Yuri Vasilyev, prodüser Mixail Deqtyar və “Kinofest” Prodüser Mərkəzinin direktoru Sergey Braqin iştirak etmişlər. Nizami Kino Mərkəzinin konfrans zalında qonaqların və Mədəniyyət və Turizm Nazirliyi əməkdaşlarının iştirakı ilə media üçün mətbuat konfransı keçirilmişdir.

Açılış mərasiminin rəsmi hissəsindən sonra rejissor Renat Davletyarovun “Təmiz sənət” bədii filmi nümayiş edilmişdir.

Məlumat üçün bildirək ki, kino günlərinin  repertuarına rejissorlar Yuri Vasilyevin “Qəhrəman”, İndar Djendubayevin “O, drakondur”,  İlya Çijikov və Anton Çijikovun “Bizim qəbirstanlığın oğlanı”, Eduard Bordukovun “Qutu” bədii filmi daxil edilmişdir.

M.MÜKƏRRƏMOĞLU, 
“Xalq qəzeti”