İstanbulda çıxan "Türk ədəbiyyatı" aylıq fikir və sənət jurnalının avqust nömrəsində Azərbaycan yazıçısı Kamran Nəzirlinin "Yarpaqlar töküləndə" hekayəsi dərc edilib. Hekayəni türk dilinə tanınmış yazıçı və tərcüməçi İmdat Avşar çevirib.

Jurnalda, həmçinin Azərbaycan yazıçısının həyat və yaradıcılığı barədə də məlumat verilib.

Xatırladaq ki, "Türk ədəbiyyatı"nın qurucusu görkəmli türk alimi və yazıçısı Əhməd Kabaklı olub. Hazırda nəşr Türk Ədəbiyyatı Başkanlığı nəzdində Serhat Kabaklının rəhbərliyi ilə işıq üzü görür.

Yeri gəlmişkən, ötən ay Azərbaycan yazıçısının daha altı hekayəsi Moskva və Krasnoyarskda çıxan ədəbi jurnallarda dərc olunub. Belə ki, Rusiya Yazıçılar Birliyinin Moskva bölməsinin orqanı "Rossiyski Kolokol" ədəbi jurnalının xüsusi buraxılışında Kamran Nəzirlinin "Düzgün olmayan həqiqət" adlı hekayəsi, elə həmin jurnalın əlavəsi sayılan almanaxda isə üç hekayəsi --"Qaranlıq oğruları", "Şəkil haqqında ballada" və "Yarpaqlar töküləndə" hekayələri verilib. Krasnoyarskda çıxan "Den i noç" ədəbi jurnalı isə yazıçının "Ölən uşağın xatirələri" və "Yarpaqlar töküləndə" hekayələrini dərc edib. Hər iki hekayə jurnalın 3-cü nömrəsində verilib. Xatırladaq ki, hazırda bir sıra MDB ölkələrində, o cümlədən Belarus, Moldova, Ukrayna, habelə Litva, Polşa və Almaniyada Kamran Nəzirlinin əsərlərinə  maraq yaranıb. Yazıçının bu ilin sonunda Minskdə belarus dilində hekayələr kitabının  çapdan buraxılacağı bunun bariz ifadəsidir. Hazırda müəllifin bir neçə hekayəsi moldovan, rumın, alman və bolqar dillərinə də tərcümə edilir və yaxın gələcəkdə həmin ölkələrin ədəbi jurnallarında dərc olunacaq.

V. BAYRAMOV,
 "Xalq qəzeti"