Milli  Kitabxanada  Milli Qurtuluş Gününə  həsr olunmuş “15 iyun-Milli Qurtuluş Günüdür” adlı geniş kitab sərgisi açılmışdır.

Tədbirdə çıxış edən Milli Kitabxananın direktoru, professor Kərim Tahirov ulu öndərin həyat yoluna nəzər salmış, respublikanın müstəqilliyinin qorunub saxlanılmasında, bu gün bütün dünya azərbaycanlılarının həmrəy olmasında liderin əvəzsiz xidmətlərindən danışmışdır. O, bildirmişdir ki, 1991-ci ilin oktyabrında Azərbaycan müstəqillik əldə etdikdən sonra ölkədə daxili vəziyyət və hakimiyyət böhranı yarandı. İctimai həyatın bütün sahələrində xaos, hərc-mərclik baş alıb gedirdi. Orduda da vəziyyət ağırlaşır, fərarilik artırdı. Erməni təcavüzü gündən-günə güclənirdi. Azərbaycanda hakimiyyət boşluğu yaranmışdı.

Gənc respublikada rəhbərliyə yiyələnmək üçün ayrı-ayrı şəxslər və qruplar arasında mübarizə gedirdi. 1992-ci ilin mayın 14-də hakimiyyəti ələ keçirən Xalq Cəbhəsi ilk gündən özünün qeyri-sağlam fəaliyyəti ilə ölkəni idarə edə bilməyəcəyini göstərirdi. 1993-cü ilin yayında Azərbaycanda vətəndaş müharibəsi təhlükəsi yarandı.

Vətənin belə ağır günündə xalq Naxçıvandan Azərbaycanın görkəmli oğlu Heydər Əliyevi Bakıya dəvət etdi. Heydər Əliyev xalqın və respublikanın hakim dairələrinin təkidli dəvətini qəbul edib, iyunun 9-da Bakıya gəldi.

Heydər Əliyev çox az zamanda Azərbaycanda vətəndaş müharibəsinin qarşısını ala bildi. 1993-cü il iyunun 15-də Heydər Əliyev Azərbaycan Respublikası Ali Sovetinin sədri seçildi. Beləliklə, 15 iyun tariximizə Milli Qurtuluş Günü kimi daxil oldu. Xalqın tələbi ilə Milli Məclis 1997-ci ilin iyununda bu günü bayram elan etdi. Kərim müəllim  kitabxanada  təşkil olunan  sərgidə  təqdim olunan kitabların bu  böyük tarixi hadisəyə həsr olunduğunu  vurğulamışdır. Burada  ümummilli lider Heydər Əliyevin həyat və yaradıcılığını, siyasi fəaliyyətini özündə əks etdirən müxtəlif dillərdə çox qiymətli kitablar yer almışdır. Qeyd edək ki,  sərgi  bir neçə gün davam edəcək.

M.MÜKƏRRƏMOĞLU,
“Xalq qəzeti”