Ümummilli  liderimiz  Heydər Əliyev Azərbaycan mədəniyyətinin inkişafını hər zaman yüksək  qiymətləndirir, ziyalıların  nüfuzunu  yüksəltməyə, yaradıcı fəaliyyətə  yardım etməyə çağırırdı.Ulu öndərimiz “Yüksək mədəniyyətə malik olan xalq həmişə irəli gedəcək, həmişə yaşayacaq, həmişə inkişaf edəcəkdir. Dünya, ümumiyyətlə, quruculuqla, tikib-yaratmaqla yaşayıb, inkişaf edib”, – deyə qeyd edirdi.

Azərbaycan Respublikasının Prezidenti İlham Əliyev də həmin kursu davam və inkişaf etdirərək  milli mədəniyyətə, təhsil, elm və incəsənətin inkişafına, maddi və qeyri-maddi mədəni irsin qorunub saxlanmasına, iqtisadiyyatın rəqabət qabiliyyətliliyinə,  beynəlxalq əməkdaşlığa, bütün dünyada Azərbaycanın beynəlxalq nüfuzunun və onun mədəni imicinin möhkəmlənməsinə böyük töhfələr verir. Bu  baxımdan Azərbaycan Respublikasının Prezidenti yanında Dövlət İdarəçilik Akademiyasının professoru, tarix elmləri doktoru Fuad Məmmədovun ölkəmizdə mədəniyyətin inkişafına, sistemli kulturoloji tədqiqatların nəticələrinə həsr edilmiş “Kulturologiya, mədəniyyət, sivilizasiya” monoqrafiyası  müasir cəmiyyətdə elmi və praktik cəhətdən mühüm əhəmiyyət kəsb edir.

Kitabın “Kulturologiya haqqında anlayış”, “Mədəniyyət haqqında anlayış”, “Sivilizasiya haqqında anlayış”, “İdarəetmə, beynəlxalq, insan münasibətləri, sülh, liderlik, ailə, özünüidarə... mədəniyyətləri” və digər bölmələri insanların elmi dünyagörüşünün formalaşmasına, mədəni səviyyəsinin yüksəlişinə, milli insan kapitalının əsasını təşkil edən mütəxəssislərin və gənclərin intellektual və etik biliklərinin genişlənməsinə, Azərbaycanda multikultralizm siyasətinin uğurla həyata keçirilməsinə, ümumiyyətlə cəmiyyətin  müasir inkişaf problemlərinin təhlilinə yardım göstərir.

Kitabın ayrı-ayrı bölmələrinin materialları mütəxəssislərin peşəkar hazırlığı və etik inkişafı, rəhbər işçilər, şəxsiyyətlər və liderlərin formalaşması, əmək və ictimai münasibətlər mədəniyyəti, Azərbaycanda ailə, gənclər və uşaq mədəniyyətinin inkişafı istiqamətində mühüm əhəmiyyət kəsb edir. Kulturologiyanın mahiyyəti və hüdudsuz imkanları ilə oxucunu tanış edən, dəyərli vəsait olan kitabın xülasəsindən belə bir nəticə hasil olur ki, kulturologiya elmi, təhsili və maarifinin qabaqlayıcı inkişafının bütün səviyyələrdə hüquqi təminatı, mütəxəssislər və respublikanın müxtəlif əhali kateqoriyaları arasında universal kulturoloji biliklərin yayılması, Azərbaycan cəmiyyəti və dövlətinin strateji resursu olan insan kapitalının inkişafı üçün yeni imkanlar açacaqdır.

Kitab “Simurq” Azərbaycan Mədəniyyət Assosasiyasının Rəyasət Heyəti və ekspert-məşvərət şurası tərəfindən ali məktəblər üçün dərs vəsaiti və şəxsiyyətin özünü təkmilləşdirməsi üçün əldə rəhbər kimi tövsiyə edilmişdir.

Bakıda “OL” MMC nəşriyyatında çap olunan kitabın elmi redaktoru Azərbaycan Milli Ensiklopediyasının direktoru, akademik Tofiq Nağıyev, elmi rəyçilər fəlsəfə elmləri doktoru, professor Olqa Astafyeva, Bakı Dövlət Universiteti politologiya kafedrasının dosenti, tarix üzrə fəlsəfə doktoru Tahir Behbudov, Azərbaycan Dövlət Mədəniyyət və İncəsənət Universitetinin dosenti, fəlsəfə elmləri doktoru Mübariz Süleymanlı, tərcüməçi və redaktor Şəlalə Kəsəmənlidir.

Afət SADIQOĞLU,
“Xalq qəzeti”