ABŞ-ın Kaliforniya ştatının bəzi vilayət və şəhərlərində mayın 28-i Azərbaycan Milli Günü elan edilib. Bununla bağlı müvafiq bəyannamələr Azərbaycanın Los-Ancelesdəki baş konsulluğuna təqdim olunub.  

Qərbi Hollivud, Santa Monika və Torrens şəhərləri tərəfindən müvafiq sənədlər qəbul edilərək həmin şəhərlərdə 28 may Azərbaycan Milli Günü elan edilib. Həmçinin Orinc Vilayəti Nəzarətçilər Şurası da 28 may tarixini bütün vilayət ərazisində Azərbaycan Milli Günü elan edərək bütün sakinləri bu günü qeyd etməyə çağırıb.       

Sənədlərdə bildirilir ki, Azərbaycan xalqı 1918-ci il mayın 28-də müstəqilliyini elan edərək müsəlman dünyasında ilk demokratik və dünyəvi respublika təsis edib, qadınlara nəinki müsəlman dünyasında, hətta ABŞ-dan da öncə səsvermə hüququ verib.

Həmçinin 1991-ci ildə Sovet İttifaqının süqutundan sonra Azərbaycanın öz müstəqilliyini və suverenliyini möhkəmləndirdiyi vurğulanaraq, hər il ABŞ da daxil olmaqla, dünyanın müxtəlif ölkələrində yaşayan milyonlarla azərbaycanlının 28 may tarixini Milli Gün olaraq qeyd etdiyi bildirilir. Bəyannamələrdə, eyni zamanda, önəmli Xəzər bölgəsində yerləşən Azərbaycanın ABŞ-ın strateji tərəfdaşı olduğu vurğulanır.

Yusif BABANLI,
AZƏRTAC-ın xüsusi müxbiri

Kaliforniya