Aprelin  21-dən 22-dək  Slovakiyanın Bratislava şəhərində “Dayanıqlı Üzvi Çirkləndirici Tullantıların İdarə Olunması” mövzusunda konfrans keçirilib.  Serbiya, Türkiyə, Ukrayna, Monteneqro, Moldova, Bosniya və Hersoqovina, Gürcüstan, Belarus, Albaniya kimi ölkələrin iştirak etdiyi tədbirdə Azərbaycanı “Təmiz Şəhər” ASC təmsil edib.

“Təmiz Şəhər”in nümayəndələri konfrans iştirakçılarına Bakı şəhərində bərk məişət tullantılarının emalı və zərərsizləşdirilməsi, yaşıl iqtisadiyyat sahəsində sahibkarlar üçün yaradılmış şərait və imkanlar, həmçinin bu sahədə həyata keçirilən islahat və layihələr barədə geniş məlumat veriblər.

Azərbaycanlı  nümayəndələr  təqdimatla çıxış edərək  “Təmiz Şəhər” ASC-nin layihələri: tullantıların çeşidlənməsi və yandırılması zavodları, Balaxanı Sənaye Parkı, tullantıların zərəsizləşdirilməsi  poliqonu barədə ətraflı danışıblar.

Azərbaycan tərəfinin təqdimatı və videoçarx tədbir iştirakçılarının marağına səbəb olub və çıxış müzakirələrin müşayiəti ilə davam edib.

M.MÜKƏRRƏMOĞLU,
“Xalq qəzeti”