“Discovery Azerbaijan” jurnalının yeni sayı Azərbaycanı və azərbaycanlıları qiyabi kəşf etmək istəyən oxucuların ixtiyarına verilib. Bu orijinal nəşrin oxucuları yaz buraxılışında Bakıdan ölkənin Qərbinə – saz və söz diyarı Ağstafaya üz tutmaq, onun turist marşrutları, tarixi və görməli yerləri ilə tanış olmaq, elə həmin bölgədən millət vəkili seçilmiş, “qalstuksuz deputat” kimi tanınan türkoloq Nizami Cəfərovla “qalstuksuz” müsahibəni oxumaq imkanı əldə etmişlər.

Jurnalın yeni sayında Novruz bayramı da unudulmayıb. Bu dəfə oxucular Novruza rejissor gözü ilə baxacaq, bahar bayramını ekranlara gətirən kinofilmlərimizlə tanış olacaqlar. Bundan əlavə, onlar İlahi eşqin şəhəri Konyanı jurnal səhifəsində gəzəcək, iki dahinin - Şəmslə Mövlanənin görüşünü birnəfəsə oxuyacaqlar.

“Discovery Azerbaijan”ın yeni nömrəsi Azərbaycanın ilk numizmat alimi Əli Rəcəbli ilə “hikkəli sikkələrimizi” saymaq, əbədi odlar məbədi  Atəşgahın ocağında isinmək imkanı da yaradır. “Dəmir atı” - velosipedi ilə dünyanı gəzən azərbaycanlı səyyah Ramil Ziyadov və “Ferrari Xəzri”nin dizayneri, xəyallarını sürən azərbaycanlı gənc Samir Sadıqovla maraqlı müsahibələr də jurnalın bu sayında yer alıb.  Yerli və xarici turizm aləmində baş verən ən son yeniliklərlə, mart festivalları, qadınların 10 ən böyük ixtirası, milli plovumuzun dünya şöhrəti ilə də bu nömrədə tanış olmaq mümkündür. “Həftəsonu nə edim?” sualına cavab axtaranlar isə jurnalın səhifələrində atçılıq aləminə səyahət edəcəklər. Jurnalda yer alan “Turan buradan başlayır” rubrikasında isə türk dünyasını hərtərəfli kəşf etmək istəyənlər üçün maraqlı yazılar yer alıb.

Millət vəkili Cavanşir Feyziyevin baş redaktorluğu ilə nəşr olunan “Discovery Azerbaijan” jurnalını abunə yolu və ya şəhərimizin köşklərindən əldə edə bilərsiniz.

“Xalq qəzeti”