Azərbaycan Respublikasının Mədəniyyət və Turizm Nazirliyinin dəstəyi və Azərbaycanın Braziliyadakı səfirliyinin təşkilatçılığı ilə bu ölkənin Rio Qrande do Sul ştatının Porto Aleqre şəhərindəki mötəbər “Santander Cultural” mədəniyyət mərkəzində Azərbaycan bədii filmlərinin nümayişi keçirilib. Məlumatı Mədəniyyət və Turizm Nazirliyinin  mətbuat xidməti yayıb.

Bu münasibətlə yerli tamaşaçılar qarşısında çıxış edən Azərbaycanın Braziliyadakı səfiri Elnur Sultanov Azərbaycanın zəngin mədəniyyəti və milli kinematoqrafiyası haqqında məlumat verib.

Portuqal dilində altyazılarla “Buta”, “O olmasın, bu olsun”, “Təhminə”, “Çölçü”, “Dərvişin qeydləri”, “40-cı qapı” kimi ümumilikdə 14 Azərbaycan filminin nümayişi 2 dekabr 2015-ci il tarixinədək davam edib. Filmlər yerli ictimaiyyətin böyük marağına səbəb olub və hər gün xeyli sayda tamaşaçı Azərbaycan filmlərini izləyib.

Azərbaycan bədii filmlərinin Porto Aleqre şəhərində nümayişi milli mədəniyyət və kinematoqrafiyamızın Braziliyada təbliğ edilməsi, həmçinin, Azərbaycan-Braziliya mədəni əlaqələrinin genişləndirilməsi baxımından vacib və uğurlu hadisə kimi səciyyələndirilə bilər.

M.MÜKƏRRƏMOĞLU,
“Xalq qəzeti”